طريق المدرسة
محمد بن عمار14 verses
- 1وين أنا حظي رماني في طريق المدرسة◆ماعرفت الدافع اللي جاب رجلي من هنا
- 2إعترض دربي غزال ٍ جعل ربي يحرسه◆وحارت أقدامي وشفت الموت بعيوني دنا
- 3وطيته من فوق كبدي ماشي ٍ في غطرسه◆إيتهصّر لي بقد ٍ ،، يشبه لعود القنا
- 4ورمش عينه كلما سلهم بقلبي يغرسه◆وحمرة الخد ّ النديّة ، طاب ليٍ فيها الجنا
- 5الهواجيس أشغلت بالي بكثر الهجرسه◆مادريت إني برجلي ساير لدرب الفنا
- 6وأسرعت بكرات دولاب العواطف ممرسه◆رجّعتني لعهدي السالف وأيام الونا
- 7من جمال ٍ ألجم الهرج بلساني وأخرسه◆وخافق ٍ يكفخ بصدري زادني همّ وعنا
- 8قال لي ما كل ذيب ٍ شاف صيد ٍ يفرسه◆وأنت قل لي يالمتيّم ويش جابك،حيّنا
- 9قلت له بأروي المشاعر والنظر منك أترسه◆وآتحلّى من وصوف ٍ فيك ياكل المنى
- 10وأبا أحلّق فوق بحر العين مثل النورسه◆هايم ٍ بين الرموش اللي لها ضيّ وسنا
- 11كل خيّال ٍ حسب عسفه وترويض افرسه◆فيه منهو من يعاني وفيه منهو إهتنا
- 12مرّ من جنبي هنوف ٍ قال عشقك معرسه◆طبعها دايم تشاكس كل من جاء يمّنا
- 13قمت أدق الصدر حسرة والنواجذ مضرسه◆يوم حاذاني بكتفه ! ساق رجلي إنثنى
- 14قال بعد إذنك ، ترى طابورنا رنّ اجرسه◆والحضور بدفتر التوقيع ! أظنه فاتنا