أطرش الزفة
محمد بن عمار18 verses
- 1هلا ًباللي حمولي منه في درب الغرام ثقال◆سلام ٍ ماقدرنا من غلاته نختصر نصفـه
- 2تحياتي مع الأشواق مافيهن حكي وجدال◆حملها طايرالورقا حسب عنوانه و وصفـه
- 3ترانا ندعج من الهيل للضيفان صفر دلال◆ونورالعين سابقنا بكرم أخلاقـه ، ولطفـه
- 4هلابه ياهلابه عد مامزن الغمامه سال◆نتّوج مجلسه وسط الخفوق بعالي الشُرفه
- 5عزيز ٍ مارأت عيني لحسنه في العرب أمثال◆عقب شوفه وبن عمار نومه ماهنا طرفّه
- 6عليه الله أكبر صابني من غيبته سلاّل◆جميع أطراف جسمي خاملاتٍ صابها رجفـه
- 7عيونه ناعساتٍ من سحرهن يشعلن إشعال◆وصافي الشهد ينزف بالثنايا داخل الشفـه
- 8وخصر ٍمثل غصن ٍكل ماهب الهوى به مال◆وجديل ٍ يرفعه ليمن بغى يجلس على كفـه
- 9إلى منّه كشف خده لنور البدر صار هلال◆توارى البدر من خلف السحايب حشمة وعفّه
- 10متى مامّر من عندي يزلزل داخلي زلزال◆وأغيب امن الوعي وأصيركنيٍ أطرش الزّفه
- 11أنا لولاي أخاف اللة لأعلّق صورته تمثال◆أناجيها بنصف الليل إلى من صرت بالغرفه
- 12ولكن خايف ٍ من قول بن عمار حاله مال◆وهم ماشافوا اللي صار ومايدرون عن ظرفه
- 13صفالي مدة ٍ قلت الهوى ماعاد به عذال◆وصرنا بالسوالف ،، لاهرجنا نرفـع الكلفه
- 14تهنيت بوداده ،، يوم قلبي ،، للغلا ميّال◆ولكن عقب هاللي صار، عفته مالي بعرفه
- 15تمادى في عناده والجفاء ماشفت له حلاّل◆وحالي أصبحت للناس عقب الستر منكشفه
- 16ألاياوبل قلبي كان مالي في الهوى مدهال◆وأنا ماني نكوف وما أداني راعي النكفـه
- 17أنا فعلا ًهويته والغلا في مهجتي مازال◆ولكن هنت قلبي ، يتركه رغم ٍ على أنفـه
- 18بعد ماعافني عفته ولالي به على أية حال◆أ نا وش لي بخل ٍ طايب ٍ من عشرتي شفّه