أبدع المنظوم
محمد بن عمار24 verses
- 1قال بن عمار ، من هرج ٍ بداه◆أبدع المنظوم ، من قلب ٍ صويب
- 2من كلام ٍ واحد ٍ لي قـد حكاه◆هاض مكنوني وأنا جرحي عطيب
- 3أبدي بإسم الله ، وأرجيه برجاه◆من رجا المعبود عمره مايخيب
- 4حامل ٍ الطير، في واسع فضاه◆وسامع ٍ مشي النمل ، مع الدبيب
- 5من شكا حاله ، على ربه شكاه◆قابل الدعوات ، من عبده قريب
- 6مابكل ٍ ، بيصيد ، اللي رماه◆إحتمال الرمي ، يخطي أو يصيب
- 7وما نزكيّ أحد ٍعلى الله في َخَطَاه◆ياما صاد الفخ من طير ٍ وذيب
- 8عشت حب ٍماذكر في هالحياة◆وإثر مالي في الهوى حظ ونصيب
- 9مخاوي ٍ سرحان في رجم ٍ رقاه◆أسحب الوناّت مالي من مجيب
- 10حبها في القلب مدري عن مداه◆من سببها شبت من قبل المشيب
- 11الهوى ، من عقبها ، ماله طراه◆والحياة ، اللي بلاها ، ماتطيب
- 12زولها يطري عليّ وسط الصلاة◆وصوتهاعن مسمعي عيّا يغيب
- 13وآعـذاب اللي هواها قد رماه◆عايش ٍ من بين ، ربعه كالغريب
- 14نورها اللي مثل بدر ٍفي دجاه◆أو كما برق ٍ من أطراف الشعيب
- 15يجهر اللي مستخيل ٍ من ضياه◆من نظرها قال ذا شيء ٍ رهيب
- 16بلحظها اللي وصل حدّي منتهاه◆سهمه القتـّال من نظرة يصيب
- 17والشعر منثور، زاهي في ، بهاه◆ايتهلهـل ، سابح ٍ مثل السبيب
- 18لو أعددّ ،، ماحوى حسن الفتاة◆ماهقيت ،، إن القوافي تستجيب
- 19بأكتفي باللي ذكرته من صفاه◆خايف ٍ هرج العواذل في الحبيب
- 20مايطيب الجرح من شيء ٍ دهاه◆ومايداويني ، علاج ولاطبيب
- 21غير منهي ، غاية القلب ومناه◆الدواء بإسلوبها ، شيء ٍ عجيب
- 22تسعف ، القلب المولع من شقاه◆من هواها صاير ٍحالي صعيب
- 23ويستريح القلب من زايد عـناه◆ويستريح البال من فكر ٍعصيب
- 24وآتهنّى بشوف معسول الشفاه◆وأشكر الله خالق الكون الرحيب