يا نسناسْ الهبايبْ
محمد بن راشد آل مكتوم22 verses
- 1يا نسناسْ الهبايبْ◆يا الباردْ الذنينْ
- 2تطلب منّي طلايبْ◆وانا ادعوايه وينْ
- 3دونهْ قطع ونصايبْ◆ومهلّكات البينْ
- 4حنّت بعض الّركايبْ◆خشع البكارْ الهينْ
- 5خلوي بالخبايبْ◆دارت ولدها وينْ
- 6من يختلط في النّايبْ◆إرغاها والحنينْ
- 7قول المعنّا صايبْ◆تبع المجفي محينْ
- 8دمع العين العتايبْ◆منها خلاة العينْ
- 9فرق الولف الحبايبْ◆ومتابع المجفينْ
- 10أتخايلهم قرايبْ◆منّي وهم نازينْ
- 11واتحسّب أنّي صايبْ◆وفي مدراتي ضمينْ
- 12في لفحات الهبايبْ◆ثرالصّواب امحينْ
- 13خذ م المهار الحايبْ◆ومن الوحوش العينْ
- 14عين الجريس الدّايبْ◆واهدايبها زفينْ
- 15ومفرّع م الذّوايبْ◆ضافي على المتنينْ
- 16عوده لدن الّرطايبْ◆كالخيزران اللّينْ
- 17معزول ردف وحايبْ◆ومضمّره فترينْ
- 18كل شيّ له سبايبْ◆والنّاس المغرضينْ
- 19مدراتي للقرايبْ◆مدراة خشم أو عينْ
- 20يا بو خليفهْ ثايبْ◆خصّيتك يالفطينْ
- 21إن حدّتنا نوايبْ◆انته الرّسخ المكينْ
- 22وانته الذرا والحايبْ◆شمخ عالي ضمينْ