يا غيث يا ليث
محمد بن راشد آل مكتوم13 verses
- 1أطلقت سبق الكلام وإنت تدري بي◆أنّي إذا حانْ الكلام أنوّع أنغامِي
- 2حلواتْ معنى ولا فيهن عذاريبي◆يصوغهن باقتدارٍ صايغ إلهامي
- 3سرى عليهن بليلهْ سرية الذيبي◆صيّاد ما خاب دايم مخلبهْ دامي
- 4لو لبّسوهن عقودٍ للغراشيبي◆تاهن على الغيدْ في ملبوسها السامي
- 5ومن يقدر ايجيب وصفك م الأعاجيبي◆وصف السما والمطر والموج لطّامي
- 6ملكتْ كلّ المعاني وحدك تصيبي◆إذا المعاني تجلّت كنت قدّامي
- 7يا أوّل الناسْ في عالي المراتيبي◆ومن دونك الناسْ حاكم فوق حكّامي
- 8يا غيث يا ليثْ يا خوف ويا طيبي◆يا ماء يا شمس يا متلف ويا حامي
- 9كذاك فعل الضواري يا معازيبي◆كلّ الجوارحْ على مفروسه العامي
- 10يا زايد واسم زايد وحده ايثيبي◆يكفي عن الجيش بالرايه والاعلامي
- 11لولا احتمالك وتذليل المصاعيبي◆دولة الإمارات كانت بعض الاحلامي
- 12إنته لنا العيد فرحات وتراحيبي◆وايّامنا بك أعياد طول الايّامي
- 13وعيد الجلوس الذي طيبه على الطّيبي◆كان البدايه لمجد وعز وانعامي