مدارات
محمد بن راشد آل مكتوم26 verses
- 1يبتسم لي كلما دار الفلك◆بدر لي وحدي إذا أسري ينير
- 2ساطيٍ حبّه على قلبي شبك◆له أنا الأول وباتم الأخير
- 3يسعده شوفي ولو ذاق الضنك◆حافظٍ عهدي وبي وحدي جدير
- 4ولي صديقٍ للظبي ناصب شرك◆يحسب أن الظبي في أمره غتير
- 5البراري يا صديقي تجهلك◆والبراري منهج الشخص الخبير
- 6روح نام وفي خباك ومدهلك◆واكمل الراحات في غبط السرير
- 7يوم جن الليل والداجي حلك◆ويوم بعض الناس ضيّع في المسير
- 8في مدارات الكواكب والفلك◆والنجوم الساريات لها نظير
- 9لا تحاول في لحم ماهو إلك◆ولا تمد ايديك شروات الضرير
- 10والمعاني بالتجارب تنملك◆وحد منها مغتني وحدٍّ فقير
- 11من خبر غابه ولا فيها ملك◆والأسود تسود والسايد كبير
- 12إسأل العرّاف اللي يجهلك◆قبل توقع في وسط هيمٍ غزير
- 13كيف تفكيرك لهذا وصّلك◆والذي ماحس ماعنده ضمير
- 14وان جهلت وقل عرفك ضلّلك◆ليس عيبٍ في العرب أن تستشير
- 15لا تدوس بدرب ما عمره سلك◆ميّز وخلّك على المعنى حذير
- 16وارفع شراعك إذا حيدك برك◆هوب من كل اشمعه يشبع بعير
- 17لا تسير بليل في درب الهلك◆ولاتظن الزين يفرش لك حرير
- 18ما تميّز من بنانك مفصلك◆وعن ذراعك الايسر الأيمن قصير
- 19يا الليالي العاتيه ما تمهلك◆والجفا مابه شفيع ولانذير
- 20هوب كل الخيل نقوات الرّمك◆وهوب كل اللي له جناح يطير
- 21وكل طيرٍ قوّته إن هو مسك◆حسب حجمه حر أو وكري صغير
- 22شوف .. والدمّي ترى يصيد السمك◆وشيفته جارح لمن ماهو خبير
- 23ويقنص البذوار ويصيد الحلك◆والثعالب تقنص الديك الكبير
- 24والحياه حظوظ هيه توصّلك◆وكم يردّي الحظ من شخصٍ خطير
- 25صادك الفخ الذي ما له فكك◆شبكة الحر الذي بصيده بصير
- 26والذي حاين وعوقه في امحرك◆يخبره بقرب الأسد صوت الزئير