شوف تأثيرك
محمد بن راشد آل مكتوم15 verses
- 1شوف تأثيرك من الجرح الوثيج◆احـتباس الدّمّ في وسط العروق
- 2وانـحدار الـدّمع كالسّيل الدفيج◆مـن شوامخ سحبها رعد وبروق
- 3فـي قتام الوقت ضيّعت الطّريج◆مـا ظهر في ليلي المعتم شروق
- 4مـوجكم طامي وانا بلجّه غريج◆فـي بحورٍ موجها غزر العموق
- 5مـن بشاكي بك وانا منّك عويج◆لا ظلم قاضيك ضاعت لي حقوق
- 6مـا يـعاتب قلب لمحبّ الشفيج◆غير من لا ذاق طعم الحب ذوق
- 7يـا رفيج الخير قل لي يا رفيج◆كـن مـعايه دايمٍ صافي صدوق
- 8شوفكم يشعل وسط جوفي حريج◆ومن يطيق النّار واشعال الحروق
- 9لو جبال (عسير) حملي ما تطيج◆أصـبحت بركان مطحونه دقوق
- 10تـحيي الأشـواق نفحات الأريج◆نـابض الذكرى يجدّد لي طروق
- 11صـوبكم قـلبي بـدقّاته خـفيج◆مع هوى النّسمات مشطون خفوق
- 12مـن قبض لخطام بالكفّ العويج◆مـثل من يمّن لامانات السّروق
- 13لـو ظـمّيه حـدّها حرّ الوهيج◆تـوّها ع مـورد الـمسقى دنوق
- 14بـسكرات الـموت حيّه ما تفيج◆لـدّها الـمنهاج لو كانت سبوق
- 15حـرّ شـامي ما ينال الاّ الخفيج◆شاف ربد الصّيد والشّارد عتوق