الضحكه الكذوبه
محمد بن راشد آل مكتوم11 verses
- 1تضحك ومن هجرك فوادي مكدر◆وتداري احزاني بضحكه كذوبه
- 2وجدي تفجر في ضميري ودمر◆احصون صبري وما ليه عنك توبه
- 3حاولت نسيانك ولكن تعذر◆علي نسيانك بنفس امغلوبه
- 4ما انته الوحيد اللي بحسنك امصور◆مثل البدر حسن ودلال وعذوبه
- 5لكن قلبي بك لوحدك تاثر◆وروحي على حبك اراها امغصوبه
- 6اورد عليك وبالظما عنك اصدر◆ظامي وما عندك لودك مثوبه
- 7تلعب باحساسي ياليت اتذكر◆اني بشر واحساس مايلعبوا به
- 8صدقت فيه عاذل ساعي ابشر◆ما حس قلبك ان خلك سعوا به؟
- 9وصديت عني عامد واتعذر◆ما اتخاف يا ظالم تصيبك عقوبه؟
- 10واللي دهاني منك ما حد يقدر◆على علاجه منه روحي امعطوبه
- 11بي شي بالانفاس يحيا ويكبر◆ويموت بالانفاس يا ذي عجوبه؟