اغسلي بالبرد
محمد بن راشد آل مكتوم12 verses
- 1اغسلي بالبرد قلب صبٍّ تشهَّد◆بعد عقلٍ يدلّه ضاع منه الدليل
- 2ساهرٍ ما رقد لين جفنه تجمَّد◆يسهر الليل كلّه في نحيبٍ طويل
- 3جمر شوقي توقّد في ضميري وعَوّد◆بالعنا والكلافهْ والبكا والعويل
- 4لو لحسنك سجد في هواك وتعبَّد◆وأصبح الشوق ملّه كان لجلك قليل
- 5كلّما اللّيل رد ذكرها له تجدّد◆علّةٍ فوق علّه من يداوي العليل
- 6بين صدٍّ وردّ ناعس الطرف سَدّد◆نظرةٍ منه عجله من تصيبه قتيل
- 7بعد طيب الوعد من أودّه تمرّد◆ما رحم قلب خلّه شام عنه الرّحيل
- 8ملّ منّي السّهد لو ينام المسهّد◆طيّب النّوم شَلّه ظبي طرفه كحيل
- 9سامني بالزّهد وفي غرامي تزهّد◆منوتي ليت فعله مثل وجهه جميل
- 10له نصيب الأسد في فؤادي مؤكّد◆وناظري مستحلّه وما لحبّه بديل
- 11إن تقرّبت صدّ أوتبعّدت هدّد◆حيّرنيه بدلّه وين بأمري أميل
- 12مستحيل البعاد له دموعي بتشهد◆وانت يالعمر كلّه قربك المستحيل