أسمع صدى صوتك
محمد بن راشد آل مكتوم16 verses
- 1أسمع صدى صوتك مع ضجّة النّاس◆والحسّ يسري للضماير حسوسي
- 2أنسى معاك العزم والفكر والياس◆وحبّك بقلبي للضّمير امغروسي
- 3واهيم في بحر بالأمواج غطّاس◆واسجّ وانسى عن ربوعي جلوسي
- 4قربك شفا للرّوح والنّود نسناس◆وروياك سعدي عن ليالي نحوسي
- 5يامورّد الخدّ المعسّل بالالعاس◆ياضي جبينه في الظّلام الدّموسي
- 6العين عين اللّي على الكفّ حبّاس◆والصّيد له بمعوّدات الفروسي
- 7فرخ الحرار امذهّب الرّيش طلماس◆أشقر عليه امن النّداره هيوسي
- 8ياضي ضيا خدّه كما نور نبراس◆والاّ شعاع الشّمس قبل الغلوسي
- 9عنق الخشوف اللى محاوز عن الناس◆دق العنود اللى ترب الطعوسي
- 10يرعى زماليج بها الورد نفاس◆يقطف دنق في مرتعه ومحروسي
- 11كنه يحشّ القلب مرهوف لمواس◆حشّ الصّريم اللّي نواه اليبوسي
- 12عليه من فقدي ووجدي ولحساس◆مثل الضّريم اللّي عليه امحموسي
- 13نار اتّواقد هبّها نود لسّاس◆موقد غضاها من حطبها يبوسي
- 14مادمني حيّ فلا بقطع الياس◆حبل الرّجا والاّ قطعت النّفوسي
- 15طيفك يراودني مع غفلة الحاسّ◆ويسود جوّي والمشاعر حبوسي
- 16وآتيه في صحرا ولا جيد مرواس◆واهيم في دنياَ عراها لبوسي