على الكيف
محمد بن ابراهيم البراهيم12 verses
- 1محدٍ تجي دنياه دايم على الكيف◆يومٍ محل و اليوم الآخر مريفه
- 2لا تلتفت تكثر عليك التحاسيف◆ما فات منها مات خله بكيفه
- 3ترقى بصيتك فوق روس المشاريف◆و تمشي معك مثل الهبوب اللطيفه
- 4إليا اقبلت لمّت شتات المواليف◆و إليا ابعدت ينسى وليفٍ وليفه
- 5ما دام أنا وياك دايم ملاهيف◆و متقاسمين حبنا بالنصيفه
- 6أنا خويٍ للسهر و السهر ضيف◆و من عادتي لا حلّ ضيف استضيفه
- 7حبك نزل بين الضلوع المهاديف◆الصدق بيّن و النوايا شريفه
- 8مع غيرك إنتِ ما تطيب السواليف◆يا اللي على قلبي مزوحك خفيفه
- 9قصة غلاك تشرّف العشق تشريف◆سيرة غلى بين القلوب النظيفه
- 10إنتِ إليا وصّفت فوق التواصيف◆يا اللي لزينك كل زينه وصيفه
- 11و ان قيل به للزين و الحسن تعريف◆إنتِ عن اجمل ما يوصّف منيفه
- 12الناس تفرح بالمرابع و بالريف◆و قربك لقلبي هو ربيعه و ريفه