يقول من عدا على رأس عالي
محمد الأحمد السديري35 verses
- 1يقول من عدا على رأس عالي◆رجمن طويلٍ يدهله كل قرناس
- 2في راس مرجوم عسير المنالي◆تلعب به الأرياح مع كل نسناس
- 3في مهمهن قفرن من الناس خالي◆يشتاق له من حس بالقلب هوجاس
- 4قعدت في راسه وحيدٍ لحالي◆براس الطويل ملابقه تقل حراس
- 5متذكرٍ في مرقدي وش جرالي◆وصفقت بالكفين ياس على ياس
- 6اخذت اعد ايامها والليالي◆دنيا تقلب ماعرفنا لها قياس
- 7كم فرقت مابين غالي وغالي◆لوشفت منها الربح ترجع للافلاس
- 8ياما هفا به من رجال مدالي◆ماكنهم ركبوا على قب الافراس
- 9ولا رددوا صم الرمك للتوالي◆ولاثار عج الخيل في كل مرواس
- 10ولا قلطوهن للكمين الموالي◆ولا صار فوق ظهورهن قطف الانفاس
- 11في حومة الهيجا لهن اجتوالي◆كل يبى من زايد الفعل نوماس
- 12من بينهم سمر القنا والسلالي◆مثل البروق برايحن ليله أدماس
- 13يقطعك دنيا مالها اول وتالي◆لو اضحكت للغبن تقرع بالاجراس
- 14المستريح اللي من العقل خالي◆ماهو بلجات الهواجيس غطاس
- 15ماهو بمثلي مشكلاتة جلالي◆ازريت اسجلهن بحبرن وقرطاس
- 16حملي ثقيل وشايله باحتمالي◆واصبر على مر الليالي والاتعاس
- 17وارسي كما ترسي رواسي الجبالي◆ولا يشتكي ضلع عليه القدم داس
- 18يا بجاد شب النار وادن الدلالي◆واحمس لنا يا بجاد ما يقعد الراس
- 19ودقه بنجران ياظريف العيالي◆يجذب لنا ربعن على اكوار جلاس
- 20وزله ليامنه رقد كل سالي◆وخله يفوح وقنن الهيل بقياس
- 21وصبه ومده يا كريم السبالي◆يبعد همومي يوم اشفه بالانفاس
- 22فنجال يغدي ماتصور اببالي◆روابع ناخذ بها اخماس واسداس
- 23وان ناشني من بعض الادنين صالي◆ماني عن الزلات مخبر وبلاس
- 24كالعنبر الغالي بالاسواق غالي◆ولادرهم الفضيه على صفر ونحاس
- 25اجزيه بالصدع جنوب وشمالي◆واتلى هوى قلبي اليا هب نسناس
- 26لا خاب ظني بالرفيق الموالي◆مالي مشاريهن على نايد الناس
- 27يا عل قصرٍ ما يجي له ظلالي◆ينهد من عالي مبانيه للساس
- 28لا صار ما هو مدهل للرجالي◆وملجا لمنهو يشكي الظيم والباس
- 29بحسناك يا منشي حقوق الخيالي◆يا خالق اجناسٍ ويا مفني اجناس
- 30تجعل مقره دارس العهد بالي◆صحصاح دو دارس مابه اوناس
- 31البوم في تالي هدامه ايلالي◆جزاك يا قصر الخنا وكر الادناس
- 32متى تربّع دارنا والمفالي◆وتخضر افياض عقب ماهي ابيباس
- 33نشوف فيها الديدحان متوالي◆مثل الرعاف بخصر مدقوق الالعاس
- 34وينثر على البيدا سوات الزوالي◆يشرق حماره شرقة الصبغ بالكاس
- 35وتكبر دفوف معبسات الشمالي◆ويبني عليهن الشحم مثل الاطعاس