ان دك به هاجوس
محمد الأحمد السديري21 verses
- 1يا زين والله ما نبي كود حسناك◆ارحم لروح في مخاطر دركها
- 2بجاه من صور جبينك وسواك◆اللي رفع سبع ثقال وسمكها
- 3ان ترحم اللي ما يبي كود لاماك◆روحي تبيك وجور حبك ملكها
- 4همه من الدنيا تزعلك ورضاك◆وكم حاجة تلزم عليه وتركها
- 5ان دك به هاجوس ذكرك تمناك◆وراحة شماله في يمينه فركها
- 6وقلبه يدور وينتحي يم مرباك◆كما يداور للكواكب فلكها
- 7يا غالي دايم على البال ذكراك◆حبك سبى قلبي وروحي شبكها
- 8ليتك تشوف اللي الى حل طرياك◆هاك النظير اللي دموعه سفكها
- 9انا إلى مني تذكرت فرقاك◆كنه يلوج بموق عيني حسكها
- 10وانا الحزين وعذبتني سواياك◆وخليت نفسي في مخاطر دركها
- 11انا دخيل ولاجيا داخل حماك◆وابواب عفوك عرش رجلي سلكها
- 12ارحم عسى يا زين يرحمك مولاك◆وعقدة حبال الهجر عجل فككها
- 13الروح لو أني بعيد تمناك◆والهجر والحرمان فيهن هلكها
- 14مدري متى الايام تسمح بلاماك◆ومتى محابيلي تصيدك شركها
- 15رميتني يا زين بحياض الادراك◆وطبيت بغباب ظلام حلكها
- 16يابو هلا في ساعة الضيق ابنخاك◆ياللي تبيع الروح في معتركها
- 17انخاك ياللي تسفك الدم يمناك◆الى تنازت بالنشا ما رمكها
- 18افزع لمفجوع على البعد ناداك◆والياس روحه بالضماير حشكها
- 19ان ما فزعت لغالي الروح تفداك◆اكبر خطر هجم علي ومسكها
- 20الطيب والله من مقرك ومجناك◆وخالك مصادير الجزيره حبكها
- 21المملكه عذرا تنور بالافلاك◆حمى طهارتها ولا حد فتكها