حقك يا شعب الحرق بجاز
محمد ابو يوسف27 verses
- 1حكومتنا غاويه تجوعنا --- وتلوعنا◆وارجع لى تانى مرجعونا -- يا عبغفار
- 2يا حكومه جبتى لى الكافيه - وموت بلا قافيه◆وأدينا عايشين بالعافيه -- والعيشه مرار
- 3أحزاننا فوق راسنا تواصل - وهو دا الحاصل◆واقلامنا تكتب وتواصل - أقلام أحرار
- 4تعبنا م الخوف آه يانا - ذل كفانا◆انساننا أهو مات جوانا - ونهق يا حمار
- 5دا عيالى مش لاقيه الهدمه - وحق الجزمه◆وبلاش أقول ومفيش لازمه - الدور أسرار
- 6العيشه خلاص بقيت سوده - وبقت موضه◆ما تعرف حتى تجيب بيضه - ولا حتى صفار
- 7والمنفوخين كل معلم --- صدغه متلم◆فى المجلس يقعد ويبلم - ولا صدغ حمار
- 8يا واخد أرزاقنا فى ايدك - الله يزيدك◆دا شعبنا كله عبيدك - وانت الجزار
- 9بلاش ياسيدى تريحنا - ياللى دبحنا◆الخدامين دول يعنى احنا - عندك فى الدار
- 10يا عم ياللى محررنا -- دانت قدرنا◆طولت فى هواك أعمارنا - وجلبت العار
- 11جعلت المنكر معروف -- والحق كسوف◆والشعب دا ميت م الخوف - وكمان منهار
- 12يا عم ياللى بتقتلنا -- وتنهب نيلنا◆وصار كده بيكم ليلنا -- ما طالع له نهار
- 13واللى يفتح لك موضوع -- لو مش ممنوع◆يترمى ويموت م الجوع - خلف الأسوار
- 14اوعاك تقول لى فيه تزوير - وتعمل لى خبير◆مصر ظايطه غفير ووزير -وحيتانها كبار
- 15رئيسها ظايط والأتباع --- كله بينباع◆من أجل حبة مال وبتاع - وجنيه ودولار
- 16وعايبه طالع لنا ومعيوب - وحال مقلوب◆ومعاها عيالها ودا المطلوب - يا مصر عمار
- 17واقفين على ابوابنا الأعدا - وحكومه قاعده◆على قلبنا كده متواعده - من غير انذار
- 18والشعب مدعوق قاتلينه -- حد يعينه◆مبهدلينه وهاريينه --- وحاكمينه بنار
- 19حاكم وحاشيه منافقينه -- ومخليينه◆يشوى فقيره ومسكينه - يا ما هما كتار
- 20مكتوب علينا يحكمنا - -- ويشكمنا◆على رأى صاحبى ويألمنا - عصبة أشرار
- 21الكل واخد تموينه --- ومحروق دينه◆اعلام يساعده ويعينه - طغمة فجار
- 22ومهما كنا نعيش فى هلاك - يبنى الأملاك◆وياخد فلوسنا هنا وهناك - زى المنشار
- 23والكل نازل ما هو طالع - ولسانه بالع◆يا اما ان بلضم ضالع - فى الاستخبار
- 24هقول لكم كلمه أخيره--- فضوها سيره◆مصر مقهوره أسيره -- وعيالها صغار
- 25روح يا سيدى البد جوه -- وهى دى القوه◆حكام لا مله ولا مروه -- ولا لستعمار
- 26و الحق على شعب راضى --- مخه فاضى◆حكامه خصمه والقاضى - م الدار ع النار
- 27حقك يا شعب الحرق بجاز - مرسل ومجاز◆سكوتك ده أكبر انجاز -- لولاة العار