أبويا م الأبطال
محمد أسامة البهائى54 verses
- 1أبويا م الأبطال المعروفين◆أتلمينا حواليه ملهوفين
- 2نسمع حكاياته في العبور◆وقد إيه كان صبور
- 3تقول لي أتبسطت ؟◆أقولك لا ، دا أنا مبهور
- 4واما فكيت الخط ووعيت◆لقيت من مبتدانا ف العصور
- 5المصري دايما جسور◆وبشاير خطانا ع الجسور
- 6فتحت عيونا ع الزمن◆وخدتنا لأزهى العصور
- 7صفحة للحرية وصفحة نور◆للأبد منحوت ع السطور
- 8دم الشهيد يفوح عطور◆نقطه دم و نقطه نور
- 9وشاهدة يا أرض سينا◆كل شبر بنقطتين معجون
- 10بكل زند في الأيدين نكون◆ياما أتكاتفنا في الصفوف
- 11وخدتنا الشهامة بالألوف◆النصرماكانش وليد الصدفة
- 12ولاعجز م الأعادي و خوف◆واجهنا داناتهم ساعة القصف
- 13وف الخنادق أتبادلنا العطف◆خاف كل مين فينا ع الثاني
- 14والموت بيخطفنا خطف◆الهم في العموم لا ممنا
- 15وكل شبر يامصر حته منا◆والحق اللي بيه آمنه
- 16رجع بعزم الرجال◆ووقفتنا كتف بكتف
- 17كتير أتشوقنا لطعم النصر◆علمني أبويا خريطة مصر
- 18اللي فيها يبنى طوبة◆ف الجنة مش طمعان في قصر
- 19قد ما يعلا بك يامصر◆كانت مهمومة ببنا الجدود
- 20ـ ها أزيح الكرب عن بلدي◆ولا أنا محدود؟
- 21لمحت ف العيون أمل مفرود◆ولمحت ع المدى بكره بيقرب
- 22وبناني عاليه حمامها بيفرد◆وضحكات الوليد
- 23والفرح بيقرب زي العيد◆وليلة الرؤبة)
- 24الكلمة نطقت بالعبور وبوقتها◆أتغير شكل وطعم ولون الوجود
- 25النور هوه هوه يزيدنا حماسهُ قوه◆والعزم هوه هوه يامين عطشان مروه
- 26رد كل واحد في الكتيبة قالي هوه◆من كتر لمتنا في الصبر وفي الأخوة
- 27رد حق واعتبار◆أبويا قالي النكسة نار
- 28يوم ما تكبر هاتحمى دار◆وإن ما عرفتش تبقى فار
- 29حسيت ساعتها ليه بنحلم بالأفكار◆وليه مخبئ جوه طيبه القلب نار
- 30ليل نهار كاسي لحمه بأفرول الانتظار◆في الجبهة عيشة وملحه مغمس مرار
- 31كان ذى الكنال غويط الأرار◆ست سنين خدمته كان ملازمة
- 32ما كانش الحديد أشد من عزمه◆اليهود من خوفها منه علو ساتر
- 33جابوا له بارليف وعملوا المستحيل◆أتباهوا بمتانته اللي هاتحمى إسرائيل
- 34ونسيوا انتظارنا للمصير◆ست سنين وأبويا بينز إصرار
- 35محروم من لمة العزوة وم الهزار◆في القنطرة تقابله وف ا ديفرسوار
- 36وفى رأس العش وفى القصير◆رحلة عاشها من جنوبنا لبورسعيد
- 37أكل م الأروانة مع ستميت شهيد◆ها نعدى يا ولاد وها نبقى أيد في أيد
- 38ها ندُك لهم الحصن الخطير◆ست سنين والفرح ما عتبش دار
- 39وقله الرزق بتزيد ع القلب نار◆أحنا أبتلينا باليهود ولا دا اختبار؟
- 40ياكل قلب بالهموم موجوع◆يا أمه محمد يا أمه يسوع
- 41تراب سينا حقنا المشروع◆م الدنس ح نطهره تطهير
- 42الثكالا و الأرامل موجوعين◆واليتامى فين ما كانوا محرومين
- 43مآسي ومخاطر تتبع مخاطر◆ومصر ما بتفارقش خاطر
- 44وبحق اللي ابتلانا باليهود◆حقوقنا حتما وحتما تعود
- 45يا بركان الغضب فور◆يا سبت شاهد ع الكرامة ثور
- 46جاتنا الأوامر بالعبور◆يا مدافع جواكى دافع للخلاص
- 47ياكل دانه وكل طلقه م الرصاص◆على هامه وزيدي جوانا الحماس
- 48يا طيارات متحنيه من تراب أنشاص◆دكي الغشيم في داره إن كان له دار
- 49يا عيون بواسل بالشرارة هاتي تار◆ياكل تكبيره للحق قيدي وش الأرض نار
- 50يا أرض سينا جايلك أبنى دار◆مدى أيدك إفردينى راية نصر
- 51أرواحنا هانت يوم ما نادت مصر◆دمانا سالت تطهر ترابك
- 52م اللي فاكر إنه غول العصر◆افرحي لنا بالشهادة اللي تعدل مسار
- 53لمي لحمى ورمى اللي صابك من دمار◆وتعالى يا مصر نبدأ مشوار العمار
- 54
قبل ما تمنحينا نياشين لانتصار