رسائل حزينة
مجدي نجيب121 verses
- 1إيه اللي أقوله ف دنيا ما بتعرفش تشرب غير دموع ؟؟◆الريح سكت .. وف سكتته بكيت عنيا ..
- 2أنا كنت عارف إني شايل بين إيديا روح كمنجه◆بتروح تسوح وتجيب معاها روح مدينتي ..
- 3.. اللي لابسه توب حزايني في الربيع◆إيه اللي أقوله ف دنيا ما بتعرفشي غير شرب الدموع؟؟
- 4أنا قلت أروح أشرب دفا عنيكي◆أنا قلت أروح .. روحي الحزينه فرهضت وسط الطريق
- 5كانت إيديكي ألف نجمه بترتعش ..◆كانت بعيده ع الغريق
- 6ويا الناس في روحي ..◆روحي ياما صابها ألف صاحب بالخرس
- 7داخل بعزي شفت روحي بتنبعث◆لما عيونك بوّشت صلبان عذابي شفت دمعي بيرتعش
- 8يرسم كلام معرفشي إيه معناه لكن أقدر ..◆.. أقدر أقول الآه ولا غشش حياة غيري ..؟
- 9إن كان قلبي الحزين حزن القمر فوق المدينه◆يحدف شعاعه ألف مركب ع البيوت
- 10ويعزي ويا الناس في روحي ..◆رايح أقابلك في الطريق لابسه شعاع الشمس
- 11إيه اللي أقوله ..؟؟◆حاضنك .. وحنسى إني ميت من سنين ..
- 12دنيا خساره ..؟؟◆قالها الهلال لما لمحني في الطريق محني ..
- 13قالها القمر فوق بسمته الشايبه ..◆ونا كنت وحدي في الطريق بانزع ثياب الحزن
- 14باغسل عيوني ف بحر ضحكه من عيونك◆يا نجمتي المغسوله بالأحلام
- 15ويا ابتسامه في دنيا من غير ابتسام◆نقرت طيور الابتسامه فوق حيطان قلبي الإزاز ..؟؟
- 16أنا قلت مين يطرق بيبان مارد حزين ..؟؟◆الريح سكت .. روح النسيم عادت
- 17عدى الحمام هزاز ..◆وشفت ضله ف نهر قلبي فوق حيطان قلبي الإزاز ..
- 18أنا قلت مين يقدر يطير و يجيب كلامه م الحرير؟◆مين .. مين بيطرق فوق جفون قلبي الضرير؟
- 19دا الريح شرب من سدري مزيكتي◆وفضلت أحلم بالحمام يرجع يطير ..
- 20.. يرجع عشان يمسح لي تنهيدتي◆الليل وحيدي و عايش .. جوه أحلام الغمام
- 21لو طال خيالي خوخ خدودك مش حيطول غير الابتسام◆لو كان خيالي قلب ريح .. قلعه السحاب
- 22ماقدرش أعدي من بيبان◆مكتوب عليها بالرموش السهرانين:
- 23إن القمر مخنوق في ليلة حب ..◆إن الأمل مشنوق على ضفاف العيون
- 24إن النجوم سكنت قرار الجب ..◆مجنون وراكب فوق حصان الحزن
- 25ولجامي كلمة حب فوق الريح بلا حكمه◆عديت بحار الحزن ياما كلها تشبه بحار القلب
- 26قطفت ايديا من النجوم نجمه◆و ف سري قلت أديها لصحابي
- 27وفي المدينة كان طريقي لصحبتي خالي◆ونا كنت شايل فوق ذنوب الدنيا دنيا فوق عنيا
- 28وقف الفرس من تحت تعريشة عنب عطشان◆بيشرب من عنيا
- 29.. آه يا حبيبتي .. النجمه كانت بين ايديا.◆ما لقيتش غير إيديك
- 30أول ما جيت أزرع عليها نجمتي◆ماقدرش أقول آخر حكايتي ..
- 31آخر حكايتي مُحزنه ..◆شاب النسيم ..
- 32شيبة نسيمي ف سن ريشتي في القلم◆مات النسيم ع الغصن
- 33من بعد ما اتحنى ..◆راح يستحمى في الألم
- 34جمعوا النجوم كل العرايس .. لبسوها توب نحاس ..◆توب النحاس م الحزن مش أحمر ..
- 35ولا كان في قلب المعزى واحد ليه مزاج للحزن◆القهر كان في الحلق .. كان أنفاس ..
- 36.. متجرحه في الصهد .. وادي الناس ..◆يا حسرتي عميوا ..
- 37كئن قلبي المحزنه،◆زغرد في أركانها الحزينه طير فرح تايه وتاه منه الغنا
- 38يا طائري ..◆لو كنت تقطف من عيوني نظرتي ..
- 39لو كنت تنزع ضحكتي ..◆وتشيلها و تزغرد بعيد
- 40وإن كنت يوم حاتشوف ربيع.◆نازله على كتافه العطور زي الضفاير
- 41وتلاقي قلب الورود متفتح شفايف◆تبقى حبيبتي اتنسمت منها مدينتي بالحياه
- 42بعتر عليها ضحكتي◆وف قلبها زغرد .. وخدها من هنا
- 43وابعد بعيد لاحسن مدينتي ف سدرها◆أقفاص كناريه مسلسله
- 44لاحسن مدينتي السنبله◆واللي ف رموشها خط راسماه العطور
- 45ما تساعش ضحكه من شفايف غنوتي◆ضحكت حبيبتي والسما طاطت زهور
- 46خدها يا طير .. وابعد بعيد◆دنا جوه قلبي مَحزنه
- 47إزاي أزغرد ..؟؟◆إزاي أخلي جوه قلبي أي حاجه من الربيع ..؟؟
- 48فضيت كاساتي .. واتملت بالريح◆والحلم جوه المحزنه ممدد ..
- 49ونا عشت فوق رمشك نسيم أخرس◆كل الطيور من حزنها ف سدري بتبحلق
- 50وفي حلمها الشمس تنفش شعرها ..◆إزاي أغني وضهري محني ..؟
- 51دنا قلت لما ف يوم أشيل اسمك على كتافي◆أقدر أطير والدنيا ما تساعني
- 52الدنيا صارت سجن مطوافي◆أما مدينتي والأغاني واللي عايش واللي مات ..
- 53ماقدرش أميّز ضحكه خضرا في السكات◆ونا ضهري محني ..
- 54أما المطر ..◆بيرخ يشرب م التراب
- 55ويفوت عليا يقول ما عادش الواد حيقدر ع الأغاني◆صاحبي لمحني .. سألني، جاوبته
- 56إزاي أغني وضهري محني ..◆وف عيوني لكل شيء ..
- 57نخ الفرس ..◆ونزلت أدفن كلمتي ..
- 58فارس سلاحي ضحكه دبلانه ع الخدود◆كانت ملابسي من التراب من بعد ما ينداس
- 59من بعد ما طاف جوه قلبك يا حبيبتي ..◆جوه قلبك برضه ناس
- 60كدب .. وخرس ..؟؟◆بانفض ضلوعي .. فوق ضلوعي ناح وتر
- 61عضيت مدينتي في بزها ..◆قام الفرس تاني ..
- 62والشمس قرص شعاع بيتفرفط◆جاني الكلام تاني
- 63جاني بيحبي تحت قرص الشمس◆قال الرياح حتقوم في رحله فوق محيط الخوف
- 64يتنفسوا كل اللي كدبوا تحت ظل المحزنه◆أما اللي عاشوا تحت قرص الشمس كلمه بميت حنك
- 65يتصوّروا شكل الورق◆أخضر و رسمة حب فوقه بتتولد ..
- 66راح يركبوا مركب عرق ..◆والصبح يكبر فوق عيونهم مدنه خضرا من الكلام
- 67قام الفرس تاني◆الدنيا قامت فوق جناحه .. والحرس
- 68طاطاوا البنادق لاجل يبقى الضل غيمه مزهره◆يا صاحبتي ..
- 69مثلت دور الريح ..◆ولبست كل قناع
- 70لفيت مدينتي والحواري وفوق دماغ الحزن نزلت كلمتي◆ورجعت ضحكه ف سدرها ..
- 71مليون شراع◆.. وعطشت ساعة الفجر
- 72نزلت عيوني فوق ضفاف صاحبي الكلام◆واصطدت كلمة نصر ..
- 73فين .. فين أخبيها◆نفسي أداريها
- 74وصلوا الحرس ..◆رشوا التراب ع الفجر
- 75ورجعت وقت الصهد ما بيغرز ضوافره في الدماغ◆محني بالضياع
- 76كل العيون شاورت عليا◆أما الرموش: كانت خناجر لاتهام ..
- 77العين دي قالت: مستحيل◆وعيون صحابي شفتها
- 78موال بيحدف ع المدينه غنوته◆واتنهدت كلمة فرح ..
- 79فط الكلام ع الجرح يمسح له◆بالبوسه يضحك له
- 80حط الندى من فوق بزاز الصبح ينده له:◆وف مره وقعت صرختي
- 81وقعت على كتفي الجريح◆وف مره ماتت دهشتي
- 82على رنة التسابيح.◆وف مره زامت ع الربابه كلمتين فيهم بنوح
- 83زفوا الحواري بغربتي◆لكن جناحي ما انكسرش
- 84وعدت تاني شعاع بروده ع الصليب◆حامل صليبي ف ضل رعشه فوق بزاز المستحيل
- 85لفيت مدينتي كلها◆علقت قلبي ف سدرها
- 86شاوروا عليا◆دا مستحيل الكدبه تكبر فوق عنيا
- 87-جرحت سدري لاجل ياكلوه العيال ..-◆والريح بينقر بطن إيدي وبين إيديا
- 88..حزمة ورق عرقان◆من بعد ما فط الكلام من كهوف الصهد
- 89شاوروا عليا ..◆علقت كلمه من كلامك جنب فرعة ورد
- 90ومشيت أغني لدهشتي:◆.. زي الإزاز اتكسرت
- 91مارجعش معنى الخوف ف ضله مشنقه.◆طعم المطر فيا ..
- 92يغسلني .. يغسل سكتي◆ويهش ريحة كدبتي
- 93كل اللي قلته ف كدبتي◆إني كرهتك رايه خضره ف سكتي
- 94كان النسيم مقتول على جدران شوارع ضحكتي◆كان النسيم ابن النبي مشنوق بيبكي ع الحيطان
- 95يبكي ويهبش حسرتي◆كان الرصاص خارم ضلوعه تحت قرص الشمس
- 96وف وسط غيمه شفت ضلي جنب ضلك◆وشفت طعم الموت شفايف م الكلام
- 97إيه .. إيه جرى؟؟◆قالوا النبي مشنوق وضله .. جنب ضلك
- 98يا هلترى ضلك كمنجه ولاّ ضلي المشنقه؟؟◆ولاّ ده ضل حسره في العيون
- 99ولاّ ده ضل جدراني الحزينه◆ضلي اللي مايل ع المدينه
- 100ضل الكلام .. لمّا تولده ..◆في السر فرحتنا الحزينه ..
- 101قام الفرس ..◆قام يلتفت ع الشمس .. فين الشمس
- 102يا مين يجيب جرس ..◆يجرح جبين الهمس
- 103ويصحي قلب الفارس المهزوم◆قام يلتفت ع الشمس .. فين الشمس ..
- 104يا مين يجيب للصمت حبل ويشنقه◆ويصحي قلب الفارس المحزون .. ويحلب شرنقه
- 105يحلبها لما النجمه يرقص ضلها◆في بزاز بلدنا الطيّبه
- 106يا مين يجيب للصمت باب، ما يكونش قلعه مدهبه◆قام الفرس يلحس جبين النسمه عادت ترعبه
- 107قام يلتفت ع الشمس .. فين الشمس .. فيه ولد◆ولوحده واقف يجلده
- 108وبترعبه .. كلمة .. حرس◆يصحى ويهرب بالفرس ويعود في نجمه بتولده
- 109ويعود بيغزل م البنفسج ألف مدنه من نحاس◆يضرب حيطانها تضحكوا
- 110ولا تعرفوا◆إن المدينه كلها رقصت حداد
- 111إن المشانق كلها عيونكو وضلها ..◆لكنما فارسكم المحزون بيحلم بالورق مركب كلام
- 112ولا تقدروش .. في موسم الأحزان ..◆لا تطعموا قلبه البنفسج ولا ..
- 113راح تولدوا فيه بالغزل إنسان◆وإن كنت حارجع يوم مصدي في الربيع
- 114دا لأن ساعة العصر واحد م الحرس◆طخ الفرس قدام عيونكو كلكو ..
- 115ما قدرتوا حتى تكسروا وسط الحناجر رعبكو ..◆ولسه برضه بتضحكوا
- 116قام يلتفت ع الشمس كات الشمس راميه صهدها◆في سدركو ..
- 117يا قلبكو ..؟!◆جاءوا الحرس
- 118وشكلهم: اسود غطيس◆مثل الغراب .. ومثل ليل الغريب الحزين، الوحيد
- 119مثل نبت الشر اللي طالع حر ..◆وف عيونه القهر للشايب والوليد
- 120ومثل كل الكاذبين◆والمحتالين
- 121واللي اشتروا كراسة المزاد للدخول◆لدنيا المناضلين.