الممثّل
مجدي نجيب38 verses
- 1راجع وزهره فوق بطن إيدي بتتخنق◆ورماد سنين الصمت كحّل رمش عيني بالكلام
- 2مركب ورق ..◆خدني معاه .. طفت ف قلق
- 3وشربت آخر الليل عرق◆ورجعت كلمه ف وش دنيا من نحاس
- 4صدّت عليا بسمتي◆برضك أنا ..؟!
- 5لكن خسرت الريح وصاحبي القمر◆وخسرت حتى حسرتي
- 6كل المعاني .. كلها ..◆أحزان زماني اللي ف ضفايره خيط رماد
- 7كل المعاني هيا هيا .. وسندباد،◆كحل رموشه بالطواف
- 8جاب المعاني رياح بتدبح في الشتا◆تخرم ضلوع البرتقان
- 9جاب المعاني رياح بتنزف م الجبين◆تجرح شفايف فارشه كلمه من الحنان
- 10ريتك ما جبت المعنى تاني للحزين◆راجع بجرجر غنوتي ..
- 11زي القتيله ف بحر صهد وبحر برد وبحر جوع◆والقسمه إني بغنوتي ..
- 12ضفرت دنيا بالشموع◆وف سدرها ..
- 13قالوا عليا ف يوم شبكت في ضلها ..◆ورد الربيع ..
- 14كدبوا كل الناس .. أهيا دنيتي ..!◆اتفرجوا ..؟!
- 15حتى القمر هزّاز◆زي الظلال فوق اللعب
- 16زاحوا الستار ..◆والفصل كان أول ما كان ..
- 17طائر مزوّق بالجراح◆مال الممثل .. واترمى ..
- 18كل الايدين راحت تسقّف ..◆إيه يهمها ..؟!
- 19غير بس واحده كان في عينها ..◆خيط سنابل م الدموع
- 20مال الممثل جنب غنوه في ضلها ..◆ريحة المطر ..
- 21لكن مشاعره كلها ..◆كانت حقيقه ف بحر كدبه .. واترمى
- 22مال الممثل ع المعاني يجسها◆أما نهاية طائري
- 23كانت حكايه بتتحكي◆لنجمه تايهه في السما
- 24.. رجع الممثل قلبه يفرح .. زي يحزن◆شاف الحقيقه ف بحر أعمى
- 25شافها بتفرد ضفرها ..◆وتعيد ضفاير حزنها فوق ابنها
- 26راجع .. وقلبي في بطن إيدي وصهد يرميه القمر◆باتمنى أكون من أي طينه غير أنا
- 27.. لو كنت زهرة صبر◆ترضع رماد من غير غُنا
- 28إيه بعد إيه ح اتمنى إيه ..!!◆اتحنى قلبي بالقمر
- 29طلع القمر كداب◆كحلت عيني بالتراب
- 30ورجعت تاني رجعت أنفض كلمتي،◆.. في وش دنيا م النحاس
- 31كان الممثل زي المثل مره يكدب .. مره يصدق.◆ما يهمكوش ..!!
- 32عادوا الستار ..◆أما اللي باقي م الحقيقه مش كتير.
- 33غير إن طعم الحرف طار.◆ورجعت زهره ف بطن دنيا م النحاس
- 34تطرق بيبان الخوف وتنده ع النهار◆ما يهمكوش ..!
- 35برضك أنا ..◆لكن حا دافع عن جريمتي بالسكات
- 36إن كان في قلب الدنيا معزى .. إدفنوه◆قلب الممثل مش رخام
- 37أنا شفت ليله ف حضن قلبه ألف مدنه من النحاس◆وف يوم حايدن من فوقيها
- 38لكن كلامه عن جريمته كلها ..◆.. راح تحفضوه