مع ناصر مطلق (سجع كاهن نجد)
لفى الهفتاء38 verses
- 1يقول ناصر بن مطلق البقمي◆على سجْع كاهنٍ من نجد مدري وراه
- 2مالت غْصون الشجر و أوراقها مايله◆من راهبٍ ميّزت مشيته رزة عصاه
- 3اليا توكأ عليها تدني الطايله◆لابس قلِنسوّةٍ منها تضايق عداه
- 4فيها بخط المقوقس كلمةٍ هايله◆يمر فالوادي الموحش مرور القطاه
- 5في كفه السر له فوق السنه شايله◆جيته ابا انشدْه مدري جيت بابحث خفاه
- 6مع ان بكرالكلام اْمن العدم حايله◆يقول فيما يقول انه يحب اْقصراه
- 7وانه على دارهم برق الوسم خايله◆لكن طلع من فريقه من يبي ما يباه
- 8وكثرت عليه الامم عورا ومتحايله◆ورقى على منبره مدري رقى له حصاه
- 9و وّرا عيون العور وش نجمة القايله◆لنه رسم للحياه اللي يبيها حياه
- 10ما فكّر انه يعيش العيشه الزايله◆كم له وهو فالتقشف لابسٍ له عباه
- 11لو شاف كل الديار الممحله سايله◆له بيت في قبةٍ حمراء يذري ذراه
- 12مدهال للضيف..لكن قهوته دايله..!!◆يارد على جم بيرٍ ما يطفي ظماه
- 13ويرجع وحس الشعور بداخله غايله◆كم له على الماء ينادي لين جفت شفاه
- 14وكبده بماء البير من نار الحشا جايله◆يحط وزنة كتابه وسط دلة ذكاه
- 15و يزود وزن الكتاب اللي اْهو كايله◆ويشوف بيتٍ يحبه بعد ما هو بناه
- 16آيل إلى الهدم وبيوت الفرح آيله◆لكن حقيقة شعوره في زمان الرعاه
- 17انه مع الفقر دايم حسبة العايله◆حتى و هْو للمعالي كل ظلعٍ رقاه
- 18كم مرقبٍ في عيونه ماهو بنايله◆دوّر على اللي يبيه اْمن العنا مالقاه
- 19وقفّل بعَد ما تنكّد يالفى فايله◆على سجْع كاهنٍ في نجد مدري وراه
- 20سمعت لي هرج لكن ماني بقايله◆ورد لفى الهفتاء
- 21عالت ملوك الثرى وجنودها عايله◆من كان منهم نحت هيكل بواد المياه
- 22هذي بقايا الرمك والقوّة الصايله◆جاهم أشمٍّ .. وشقًّ مارده ما قواه
- 23والواد هلّل بعد ثاني سنة حايله◆سولف خريره على صخره وقوقع حجاه
- 24عن عقدةٍ في متن هاك الأشمْ ضايله◆لعيون موية عنودٍ عرّقت بالجباه
- 25تبعثر النُمنمة من قطرةٍ سايله◆شفها بمخدع أنو شروان ولا ضناه
- 26لها كبار الجواري قامت اتحايله◆فيما مضى نسوة الفرس انطوت في حماه
- 27واليوم من بعدها ما به حدٍ جاي له◆يحمل كتابٍ مقدّس يمّ بابا قراه
- 28يوم ابتهل صلب كل الكرح متمايله◆وأنا ذو القصر الأقصى ما يجيني أذاه
- 29يومي بخمس الملاحم صغت معناي له◆وسطه سميّ القرنفل يعتنقني شذاه
- 30في منتجع تبهرك تشكيلة استايله◆ساعة حسدنا حسودٍ يعلن الله ثواه
- 31حتى جرح أذني اليسرى بمصغاي له◆وأنا من أم الظفاير قرطست في خباه
- 32قصة زمن سندريلا بعد مبكاي له◆أداه بالمانلوج وبالدوازن أداه
- 33يسحر أصيلة بلادٍ تجمح أصايله◆كم بأضلعي قبر عيطل طيب الله ثراه
- 34عليه دولة كبير القبط متهايله◆واليوم قزوين عوّد في جبال السراه
- 35والأرض من قصر رجل اللي مشى طايله◆حتى ان ناصر تَناصر بالقياصر شباه
- 36وأجاب من بالبلاد الهاشمي سايله◆وأقول عنّه كلام الغي عله فداه
- 37إن كان شمس المعارف فوقهم زايله◆من مبتداه انتبه وش كان في منتهاه
- 38والوادي الموحش اهله جات متغايله◆ما قاله الشاعر اعرف ماني بقايله