عجبنا كيف نامن لدنيانا
لفى الهفتاء27 verses
- 1عجبنا عجبنا كيف نأمن لدنيانا◆وهي لو تضحّكنا دقيقة .. تبكّينا
- 2سببها حكاوينا تخالف نوايانا◆ولو جت مساعينا توافق مبادينا
- 3ونحيي أمانينا بالأحلام جوّانا◆وماتت على كفّ الحقيقة أمانينا
- 4خذتنا خطاوينا لسكّة خطايانا◆وكثرت خطايانا وقلّت خطاوينا
- 5تعبنا على الأطلال نلقي تحايانا◆تعبنا بأغانينا نداعب غوانينا
- 6تعبنا بداخلنا نجمّع شظايانا◆تعبنا ويتعبنا حقيقة تعالينا
- 7وهذي مواجعنا هي أوّل هدايانا◆فلا بدّ تغرينا على شان تغوينا
- 8جهرنا بصوت الشعر لكنّ وش جانا؟◆طعنّا مدايحنا بخنجر مراثينا
- 9وعن برّ موطنّا لنا بحْر منفانا◆ألا يا مراكبنا بعيدة موانينا
- 10حيينا وحنا ميّتين بحنايانا◆والأيام نطويها والأقدار تطوينا
- 11نصدّق حديث عيوننا في مرايانا◆وننسى حديث أيامنا في ليالينا
- 12وقفنا نبي ركب الحياة وتعدّانا◆جدانا نقول أوّاه وش في أيادينا
- 13ومن دون غايتنا عقلنا مطايانا◆بلانا بإرادتنا عسى الله يعافينا
- 14حلمنا بما بالأمس ..واليوم صحّانا◆ولو فيه نبدا شي ما عاد يمدينا
- 15عزانا فجر بكرة وكان الله أحيانا◆صغيرة مطالبنا كبيرة هقاوينا
- 16ألا يا زمنّا كيف تقدر تناسانا◆وفي صبح حاضرنا بدت شمس ماضينا
- 17بعد ما انت شاهدنا على خيبة اعدانا◆كلامك فعايلنا وصوتك عزاوينا
- 18وهذي كتايبنا وهذي سبايانا◆وهذي بيارقنا وهذي هنادينا
- 19بصفحاتك اكتبنا والأيام تقرانا◆ولو ما بقينا باقياتٍ معانينا
- 20على مدّ شوفك كمّ تبرق مزايانا◆على مدّ سمعك كمّ ترعد أسامينا
- 21بدينا على العزّ وبدانا وبدّانا◆عزيزين يتبع عزّنا عزّ اهالينا
- 22لنا في سجلّه ما يناسب سجايانا◆على العزّ حيّانا وربي محيّينا
- 23عبرنا بحوره والله الحيّ يرعانا◆وهذي مراسينا عليها ترسّينا
- 24على الطيبة يوم ادفعتنا حميّانا◆لقينا سمانا معجبة في أراضينا
- 25عطية نقدمّها ومحلا عطايانا◆ولو ما خذينا غير هذي تكفّينا
- 26وعن كلّ ميّت قلب شامت حمايانا◆حيينا بقرب الحيّ والحيّ يحيينا
- 27بصبح الوفا لا زال يشرق محيّانا◆ولو كنت ناسينا ترى ما تنسّينا