صباحك شعر
لفى الهفتاء20 verses
- 1صباحك شعر يا شعرٍ أغنّي به على (اليامال)◆بصوت الواقع اللي يشتكي دايم من المجهول
- 2بعد ما حدّني عنّك دجى ليل وسراب ولال◆ثلاث سنين بين ولا قدرت أعرف من المسؤول؟
- 3تعبت أناجي هلالك ولا لك في سماي هلال◆وإذا طوّل سكاتك قلت أفا ليه السكات يطول
- 4غريب وسلوتي نجواي والغربة وسيعة بال◆وحلم الوصل من دونك تردّه صحوة المعقول
- 5وعاد اليوم في شوفك شربت من السعد فنجال◆لقيتك واعتذرت إني أسولف والعذر مقبول
- 6فلا تعتب على صمتي وأنا عندك ولا تجتال◆أنا ولهان والولهان بالله وش تبيه يقول؟!
- 7أبي كل السوالف تختصرها لي بكيف الحال◆كفاني حي في شوفك عقب بعدٍ ذبحني حول
- 8أبي عيني نعم تقرأ بعينك للحنين أمثال◆ولو إذني تبي تسمع كلام لسانك المعسول
- 9تعال اختال يا زولً قدم عيني فدتك أزوال◆ولا تغريك شرطان الذهب لو تستفزّ اللول
- 10أنا ويّاك في سكرة مشاعرنا تعال اختال◆وداعبني بعطرٍ من ظفاير شعرك المرسول
- 11على صوت موّالي تمخطر لي وقط الشال◆ألا يا من حباك الله جمالٍ ما حبا مجمول
- 12وسيع أعيان، زاهي لون، صافي خد، سمح اقبال◆ومدمج ساق، نابي ردف، ناحل خصر، فارع طول
- 13على وجْنَتْك شمس وفي يمين الشمس حبّة خال◆على غرّتْك ليلٍ طالعٍ بدره وهو مسدول
- 14وعينك كلما سلهمت فيها فالهدب قتال◆سيوفٍ فوقها مثل الهلال وطرفها مكحول
- 15وصدرك ذاب في عنقك وعنقك ذاب في السلسال◆ولا السلسال ذاب إلا بوردٍ بالندى معلول
- 16على رمّانتينٍ تحتهن عود القصب ميّال◆ولا يغري سوى قطنٍ تحت عود القصب منسول
- 17وساقك من حرير وذاب فيه من الذهب خلخال◆تهادى له قدَمْك أوّل وضامه فخذك المعزول
- 18ألا سبحان من كمّلك في عينٍ عليك ظلال◆وفي قلبٍ بيوم ودوم فيك مْتيّمٍ متبول
- 19وعاد اليوم عانقتك وفيك إشراقة الآمال◆تكون أول عناقٍ من صبابة وآخر المحصول
- 20وإذا به قاتل ومقتول يوم البين لا تهتال◆ترى يوم الوصال أشوف لا قاتل ولا مقتول