الهلامة والصتيمة
لفى الهفتاء30 verses
- 1كفاك ترنيمة شقى يا حمامة◆سرّيتي الشاقين وانتي مقيمة
- 2كلن شرب من ما يشوقه مدامة◆وحالت على عينه من البين غيمة
- 3وأنا شقاي أكبر شقى والعلامة◆ترنيمتك بين البكى والشكيمة
- 4ما هو شقى مغرم شكى من غرامه◆لو ابخلت يمناه عينه كريمة
- 5عابر سبيلٍ ما عرف شالإقامة◆دواه يلحق بالوسيمة وسيمة
- 6وقتٍ غشى عن نور عينه ظلامه◆وضحّك على بكي اليتيم اليتيمة
- 7اللي خصيمه قوم يلقى سلامة◆وشلون يسلم من زمانه خصيمه
- 8مات الحيا عند الحياوي كرامة◆وذبح بميلاد التطفّل تميمة
- 9يا قوم ياللي تحتمون الجهامة◆فيكم تبرّت من ولدها حليمة
- 10العام أخذتوا بالكلام الزعامة◆واليوم صارت عاد دقّة قديمة
- 11اللي تزعّم بينكم في كلامه◆زعامته ما جابت شداد ريمة
- 12ما طاول أهل الطايلة والشهامة◆قومٍ عظام ومنزلتها عظيمة
- 13ساعة غوى عن مستواه ومقامه◆ما كان يدري عاقبتها وخيمة
- 14والله محدٍ منه كِدّر منامه◆ما هو خليل الله ولا هو كليمه
- 15من لا كسى راسه بفعله عمامة◆نهار تعريف الخطوب الجسيمة
- 16يموت قبل الموت غبن وندامة◆ما شاف في نفسه لنفسه حشيمة
- 17ولا اظنّتي تحييه كلمة ملامة◆تكفيه حسرة وانكسار وهزيمة
- 18أبو دلامة يوم علّم دلامة◆ما علّمه بعض السوالف عقيمة؟
- 19عشان يحفظ ما بقى باحترامه◆حتى ولو هو ما يذبّ الخريمة
- 20قيامةٍ قدّام يوم القيامة◆جتنا بها قوم اللغو والنميمة
- 21ما لجْملي معها شداد ومسامة◆إي والله إن البعد أجر وغنيمة
- 22ما جيت أدوّر بين الأقزام هامة◆أعدّها في حق نفسي جريمة
- 23عيني عليها عن سماها غمامة◆ما شاقني منها من العام ديمة
- 24بيرٍ تعكّر ماه واجب هدامه◆ما دام ما تارد عليه المحيمة
- 25حتى البهيمة صدق وأنتم كرامة◆ما تارده حتى ولو هي بهيمة
- 26وسيفٍ ثلم حدّه عويد الثمامة◆عليه قولة سيف تبقى ظليمة
- 27لو كان في كف الهلالي سلامة◆ما جات له في ساعة الحرب قيمة
- 28والوقت ما غيّر علينا نظامه◆وما للبشر قدمه صمود وعزيمة
- 29وفي دورة الأيام لين وصرامة◆تغيّر الهدّاج قطرة حميمة
- 30يطلع من عيال الصتيمه هلامة◆ويطلع من عيال الهلامه صتيمة