الرصاص
فيصل السديري8 verses
- 1لا كتبتك بالرصاص بدفتري إحساسي ومحيتك◆أرجع أدور بقايا .. إسمك بمحايتي
- 2وما أحس إني نسيت ولا أحس إني قريتك◆قد ما أحس إني مدري منك وش هي غايتي
- 3خايف أتمنى لقاك وما ألاقيني لقيتك◆عند حسن الظن وأبلش وقتها في منيتي
- 4وإن نويت أجفاك قلي كيف أبضمن لاجفيتك◆ما يرجعني شعوري بالندم عني نيتي
- 5تدري ليه ان قلت اببعد عنك القى نفسي جيتك◆لانك بكل اتجاهات الصدود مرايتي
- 6ياللي كل اشباه وجهي تحكي عنك لاطريتك◆وانت ماعمري على وجهك قريت حكايتي
- 7إبتديتك من عرفتك وأشعر إني ما انتهيتك◆واللي ما بين البدايه والنهايه دنيتي
- 8أكتبك فيها برصاص وكل ما تخطي محيتك◆وتنكر سطوري غلاك وتعترف محايتي