صدفة
فهد المساعد16 verses
- 1الشوق ماله عمر , يفنى وينعاد◆له في الضلوع أن عاد وأن غاب رجفه
- 2مع كل فرقا , له ورى الجفن ميلاد◆وأن ماتت الفرقا لقى الشوق حتفه
- 3جيت أقتل الفرقا من بلاد لــ بلاد◆ملّ الطريق يشيلني فوق كتفه
- 4وأنا بعد مليت من كثر ما أرتاد◆هالشارع اللي كان لك فيه شرفه
- 5تظمأ عيوني شوفك , وتشبع سهاد◆عيّا الزمن يقطع ظماها بــ رشفه
- 6لاوجهك أسقاها , ولا ذاقت رقاد◆ماغير طيفك , طيفك اللي أعرفه
- 7كنّه ظبي , وعيوني ظلال صيـاد◆يجفل قبل يرتد للجفن طرفه
- 8مشكلته أنه كل ما أشتقت يزداد◆حتى ملا جدران وقتي وسقفه
- 9وأصبحت أشوفه فــ أول الغيم لاجاد◆وفــ أقصى الشفق لاطاحت الشمس خلفه
- 10وفـي الأرض لانامت عقب صوت رعاد◆وفي كل شباك ٍ صحت منه درفه
- 11أتعبت طيفك لوم , واللوم مافاد◆ويوم الأمل في شوفتك مات نصفه
- 12نويت أسافر عنك بجروح ٍ جداد◆وعمر ٍ من أوراق الزمن حان قطفه
- 13نويت , لكن جابني الشوق منقاد◆وجابك حنينك , والزمن سال عطفه
- 14شفتك تبــسّـم لي خجل مدري عناد◆وفي نظرتك شوق ٍ من الظلم وصفه
- 15حسيت كني طفل , وعيونك أعياد◆ياعيدي اللي له ورى الصدر رجفه
- 16سـمّ اللقا صدفة , وأسـمّيه ميعاد◆أنا أنتظرتك , وأنت مريت صدفه