القرايا
فهد المساعد11 verses
- 1القرايـا ساكنتنـا لـو سكنّـا فـي المدينـه◆ياكثر مافي المدينـه نـاس تسكنهـا قرايـا
- 2مثل انا لامن شعرت أني بحاجـه للسكينـه◆رحت يم القريه اللي قدرهـا بيـن الحنايـا
- 3قريتي واليوم جيتك شاعـر ٍ هـزّه حنينـه◆للوجيـه وللبيـوت وللسوالـف والحكـايـا
- 4قريتي انا فهد .. فهد .. فهد ماتذكرينـه ؟!◆أسألي عني بيوت الطين ونقـوش الزوايـا
- 5ياسقى الله قبل اسافر عنك يالـدار الثمينـه◆يوم انا طفل يشوف عيوب جدرانـك مزايـا
- 6يوم انا طفل ٍ يمر اليـوم ماشـاف الغبينـه◆الضحى وسط المدارس والشفق بين المطايا
- 7ياسقى الله يوم كنت الريـح والدنيـا سفينـه◆قبل مالدنيا تكـون الريـح والسفـن البرايـا
- 8يوم ابوي الله يبيحـه كـان ياخذنـا بيدينـه◆يم ذاك المسجد اللي فيه مـن ريحـه بقايـا
- 9ياسقى الله او بلاش ازيد هذا الطيـن طينـه◆لي هنا والعمر مابه متسّع لـاهـل الرزايـا
- 10قريتي مانيب انا اول من رجع لك وسط عينه◆دمعتيـن ٍ كنهـا لبيوتـك وناسـك مـرايـا
- 11القرايا سالفـة اهـل القرايـا فـي المدينـه◆والمدينه سالفة اهـل المدينـه فـي القرايـا