الألفيه
فهد العلوش27 verses
- 1الف ... وليف الروح سيد الحبايب = من عشرته شفت العنا والمصايب◆لاهو مداويني ولاني بـ طايب = عز الله اني شايف ٍ منه لوعات
- 2البا ... بقلبي للحبيب محبة = مهما يعذبني وينسى المحبة◆الحب مايوجد مع الناس طبه = لو هو يداوى كان دورت دويات
- 3التا ... تولع خاطري بالجميلة = اللي بسهم العين تذبح قبيلة◆كم واحد قبلي شكا من خليلة = وانا شكيت اللي عيونه وسيعات
- 4الثا ... ثمانه يوم فيها تبسم = القحويان اللي من الوسم وسّم◆انا اشهد ان الزين يومه يقسم = اخذ حبيبي قسمته عشر مرات
- 5الجيم ... جاوبت الحمامة بنوحي = ياليت زين العين يبصر ويوحي◆ويشوف قلبي من فراقه يفوحي = فوح الدلال اللي على النار مركات
- 6الحا ... حذفني هافي الوسط مره = رمحه سطا بي شفت منه المضرة◆انا اشهد ان فرقاك يازين مره = ولا ماك هي طب القلوب العليلات
- 7الخا ... خليلي خلّ قلبي وخلانِ = خلاني اقنب كني الذيب سرحان◆انا اشهد اني في هوى الزين حيران = مابيدي الا قولة ياحلولات
- 8الدال ... داويت الجروح العطيبه = ماتنتداوى والمحبة مصيبه◆ترى الهوى ماهو بيبرى صويبه = عزي لكم ياهل القلوب الصويبات
- 9الذال ... ذالي عنك يازين مده = قامت تزايد بالضمير المودة◆المهتوي ماكل شيٍ يرده = حتى ايش لو دونه دروبات صعيبات
- 10الراء ... رماني هافي الوسط بالعين = الله حسية كيف ياقف ويرمين◆بذبح بسهم العيم بليا قوانين = ياما ذبح من دون ذنب وخطيات
- 11الزا ... زريف الطول زين الحلايا = به من بنات الحور لون او تهايا◆بالخد والمبسم وحمر الشفايا = مبيسم يزها ثمانٍ رهيفات
- 12السين ... سلهم يوم شفته بغفله = يرم المولع واحدٍ ماوقف له◆والله فلا ادري كيف قر الهدف له = حتى ركز قلبي على راس مبرات
- 13الشين ... شبّت في ضميري لهايب = شبّت بقلبي نار وانت السبايب◆ارحم رمك الله ترى القلب ذايب = يابو العيون اللي هدبها ضليلات
- 14الصاد ... صوبني ضبي الحمادي = اللي هواها ساكنً في فؤادي◆انا اشهد ان الزين غاية مرادي = مالي بغيره شف لو هن كثيرات
- 15الظاد ... ظنه كان هو مثل ضني = فانا سعيد وبالحياة متهني◆يالله لاتجعل حياتي تمني = يارب سهل لي دروبٍ عسيرات
- 16الطا ... طلبت الله يجلي همومي = واسعد ولا ابقى بالحياة محرومي◆لعل حظي من منامة يقومي = واسعد بشوف الزين واجلا الحسوفات
- 17الضا ... ضميري صار كله حراقة = اسبابه المجمول طول غيابة◆ماعاد لي بالصبر يازين طاقة = اسهر واطوّح تالي الليل ونات
- 18العين ... علمتك وهاذي علومي = ياسيد روحي صرت منك محرومي◆عليك قلبي بين الاضلاع يومي = مثل العلم تومي به رياح صلفات
- 19الغين ... غليتنِ وزادت غلولي = خليتني يازين كني مهبولي◆انا جريح القلب مير افطنولي = قبل يتبين لي مع الناس غلات
- 20الفا .. فؤادي من هوى الزين ذابي = ليتك يانور العين تسمع عتابي◆وتشو.ف حالي بالسهر والعذابي = دايم عيوني من فراقك حزينات
- 21القاف ... قلبي مايبي غير خلي = يانور عيني يابعد كل من لي◆خليت دمعي فوقث خدي يهلي = خليتني بهم وغم وحسرات
- 22الكاف ... كنيت الخبر عن عدوي = ياروح روح الروح انا وش اسوي◆حبك على القلب الجريح متلوي = لك بالحشا يانور عيني محلات
- 23اللام ... ليتك ياحبيبي قبالي = منيب عنكم ياهى البال سالي◆اشغلت قلبي ياحسين الدلالي = بخدود حمر وبالعيون الكحيلات
- 24النون ... نورك مثل بدر التمامي = عذبت قلبي ياظبي العدامي◆اسهر وكلٍ في منامة ينامي = ودموع عيني فوق الاوجان سافات
- 25الواو ... ياويلي على شوف خلي = ياما سهرت الليل محدٍ فطن لي◆افداه في حالي ومالي وكلي = ولو اني باسبابه تعرضت لافات
- 26الها ... هواي الزين ظبي العدامي = سميّها بين اللحم والعظامي◆ينبت بالارض اللي سقاها الغمامي = سبحان من يخرج من الحي ميتات
- 27اليا ... ياربي تجمع الشمل فيها = تستر عليها يالولي وتحميها◆يارب تسخرها لنا وتهديها = والخاتمة لك ياحبيبي تحيات