قطار الوحدة المغاربية الافريقية
عبد العلي فيلالي بالحاج32 verses
- 1يا قطار لمحبة فوت◆ودير وقفة عند لخوت
- 2وقول لبن عمي فلجزاير◆حيد حيط لعارونجيكوم زاير
- 3قول ليه ارواح ابن عمي رواح◆نلوحو لعداوا ونرجعو خاوا
- 4حط يدك فيديا نطلقو لسراح◆ارواح ابن عمي نبنيو لبلدان
- 5اش ربحو ولادنا واحنا عديان◆واش فرق تطوان على تلمسان
- 6غير لجساد لي مفروقة علرواح◆كيف لبارح ابن عمي ليوم نناديك
- 7الدم والنسب اولد العم واحد الله يهديك◆اش فرق يديا ابن عمي لمشبوكة فيديك
- 8ولا نسيتي ايام النضال والكفاح◆الراي ارواح نرجعو لوطن لمغاربي
- 9الجزائر والمغرب خوا امازيغي وعربي◆ها الراي ابن عمي رواح عندي سربي
- 10خلي اولادنا فالمستقبل ترتاح◆ياقطارالسكة المنسية
- 11وقف لي لله نسلم على تونسية◆مرا حرة ما تقبل الضيم
- 12كريمة بنت شعب كريم◆هيا يعيشك يا تونس الخضرا
- 13يا لي نسوانها صنعت رجال◆ويعيشك يا تونسية يا لمرا
- 14يا ام على مد التاريخ للابطال◆من شاف تونس يقول عليها ورشة
- 15من بنزرت للقيروان لسفاقس◆حبابنا ويحبونا بزاف و نحبوهم برشة
- 16زور الزيتونة وسلم لي على قابس◆يا قطار وانت نازل لطرابلس الغرب
- 17ذكر لحباب بالامان و بصفى النيات◆قول ليهوم يكونو خوا لقلب علقلب
- 18يوم تجمعوا فالرباط والصخيرات◆شعب عمر المختار ما يقبل الغلب
- 19بالوحدة واليد فليد تزيان الحياة◆فوت يا قطار لغدامس ولهون
- 20وفجدابيا شور عندنا فيها لحباب◆وفبنغازي بالشعر دون و بفنون
- 21نتفكرو عاهد وجدة ولعاهد كتاب◆الوحدة غايتنا وكلشي من اجلها يهون
- 22كل واحد يتمناها ويقول مصاب يا مصاب◆ودابا يا قطار الوحدة رجع لبلادي
- 23اشتاقيت لماها وهواها◆اشتاقيت لشمسها واحضان ماليها
- 24مشتاق نشوف مستقبل اولادي◆اشتاقيت نجومها وسماها
- 25مشتاق وشوقي لكل حاجة فيها◆ما تنساش يا قطار وانت غادي
- 26لتخوم افريقيا جنود حماها◆وفموريتانيا نديرو يا قطار مزية
- 27نسمعو انغام واشعار الحادي◆نصيلو لرحام والنفس تصيب دواها
- 28ونوليو يا قطار الوحدة والحاجة مقضية◆وقبل نوليو باقي عندنا مهمة مزال
- 29نطلو طليلة على خوتنا فالسنغال◆وما ننساوش اصدقاءنا فالغابون
- 30ولكوت ديفوار و فقلب الادغال◆بلدانا حنا اولى بالخيرات لي فيا
- 31نستمرو ونشيدو ولي ليها ليها◆المغرب لكبير ولجدور فافريقيا
- 32
تحدي القرن هذا فالايام الاتية