مهوب إنت المريض .. إنت الشفا
طلال الرشيد14 verses
- 1هلا بك .. هي هلا اللي قالها الصايم ليوم العيد◆هلا بك .. هي هلا اللّي قالها للغيث هالوادي
- 2هلا بك .. هي هلا اللّي قالها يعقوب بالتنهيد◆ليوسف يوم عاد..و عاد شوفه.. و أنكف الغادي
- 3هلا بك .. كثر ما أمّنت خايف .. أو رعبت مكيد◆هلا بك يا عـدو همومنا .. وهـلال الأعيادي
- 4تصاغرت الهلا .. من كبر قدرك .. و اعذر الترديد◆لأنك شامخ مثل الجبل .. له بالصـدى حادي
- 5حسدت الشعر .. يوم إنه طليق لك .. و أنا في قيد◆وجبته يوم جاك .. و شفت فيه مـراة حسـادي
- 6مهوب إنت المريض .. إنت الشفا .. يا قريّبٍ و بعيد◆وانا أقول المريض اللي .. فقد طلّتك فبلادي
- 7سلمت إنت .. و سلمنا من سلاماتك عـن التنكيد◆أهنّيك .. أو أهنّي الناس .. أو نفسي و أنا البادي
- 8يابو كل اليتامى و الضعوف و معسـر ومريد◆غديت الشمس وقلوب الخلايـق زهـر عبّـادي
- 9عليك نخاف منك .. إلى رقدنا و إنت في تسهيد◆تقل من كثر حب الخير .. صرت لنفسـك معادي
- 10تطلّبك المرض نفسك .. و قلت أبشـر بلا تحديد◆فلا والله أرد اللي طلبني .. لو يبي زادي
- 11هذاك إنت الضليل الضافـي الوافي منـاة الغيد◆هـذاك إنت الكبير المنور المنثور بالكادي
- 12هذاك إنت الأصيل الماجد الناجد سليـل الصيـد◆هذاك إنت الرفيع المشـرق البراق والهادي
- 13هذاك إنت الوفي العارف الوارف ربيع البيد◆هذاك إنت العظيم الشامخ اللّي فـوق الأشهـادي
- 14هلا بك .. و القدر بالصدر .. لا عجز القصيد يصيد◆قصيدٍ لا درى إنّه فيك .. سمـى شـارده عادي