كلي اسف
شموخ العقلا8 verses
- 1انا كلي اسف للي بدر مني من الفاضي◆قسيت بردة افعالي وزودت العيار شوي
- 2انا ما جيت اعاتب بالملام وافتح الماضي◆مفاتيح العفو عندك عسى به من نصيبي شي
- 3خذتني عزتي باثمي وعينت الزعل قاضي◆حكم لي بالجفا عنك وانا قلبي صرخ لي عي
- 4تحسب اني قدرت انساه ترى كله حكي فاضي◆انا مقفي وفي نفسي اقول الله يرده لي
- 5انا قاعد على بابك الين تقولي راضي◆تبيها عام او ليله تدلل ما ورانا شي
- 6ابقعد لين تنصفني وتغفر ذنبي الماضي◆افضل اخسر الدنيا ولا اخسرك لو شوي
- 7حبيبي لا تعنيني مريض وبانت اعراضي◆تعبت من الشعور اللي لاني ميت ولاني حي
- 8متى ترجع سعادتنا وترجع شمسنا تاضي◆كريم انت وانا استاهل واكيد انك بتغفرلي