ياخشف اشوف ان الهوى ماله حدود
سلطان الجالي34 verses
- 1ياخشف اشوف ان الهوى ماله حدود◆وان الجسد اذا تمكن به بلاه
- 2لاثار به لاهو يهيد ولا يهود◆احساسه الي ماسمع منهو نهاه
- 3اني بليت بلا رقيب ولا شهود◆ولارشف هذا الجسد جرعة دواه
- 4ولا قدرت احل انا طي القيود◆ولا لقيت الي له ابقيدي غناه
- 5واصبح مكاني للفنا قرب اللحود◆من شافني ينشد سفاهه ما دهاه
- 6مايدري الي بالخلا جاني نشود◆اني هويت الي كسرني في هواه
- 7ياسقم حالي ياعنا هذا الوجود◆ياجرح قلبي ياشقاه وياعناه
- 8كم لي وكم شكيت لك جور الجحود◆ولا إلتقا قلبي بصادق مبتغاه
- 9ياهاجسي خذني ولك مني وعود◆ان اشتعل لك نور تمشي في ضياه
- 10ومهما يصير اصب لك فيني وقود◆لجل احترق والنبض تنعم في دفاه
- 11اكتب وحرك داخلي هذا الجمود◆ماعاد صبري يحتمل ضيعة جداه
- 12معك رقيت بعزتي فوق السنود◆معك خفوقي يشتفي ثاير هواه
- 13معك قطفت ابرحلتي ازكى الورود◆وياكم رويت الي شكالك من ضماه
- 14معك سليت ابوحشتي فوق الفنود◆معك لقا الرحال بكفوفك هناه
- 15واوصيك يامن ترتجي طول الصمود◆في صر ماتقدر تواصل مع شتاه
- 16والوقت هذا منفذ اكبار الجهود◆كلاٍ يدور مخرجه يطلب جداه
- 17والبيت مايثبت بلا طنب وعمود◆والعلم مايثبت بلا حفض ونباه
- 18رفد القناعه للفتى خير الرفود◆ووفد الجشاعه مالقا منزل حواه
- 19واذا رأيت إن الصبر طوله يكود◆فاعلم بأنه خير ماسمي بجاه
- 20واذا رايت الظلم في قوم يسود◆ايقن بصوت للفنا تسمع صداه
- 21واعلم بان اصل السياده للأسود◆من حيث ان الليث لايترك حماه
- 22ولاتجد من يشتهي طعم الجلود◆يامستمع للي تناقله الرواه
- 23لاتشتكي يانازف الجرح الصدود◆ماكل من به يتقي جرحك وقاه
- 24ولا تهب ياسالكا درب الصعود◆صلف الوعر لايثني اعزومك حصاه
- 25حتى الحبل لاصار به صعب العقود◆لك ينتقض لامن جذبته مع رقاه
- 26خذ العزم والصبر والفطنه جنود◆تصبح بعزمك والحجا قاضي القضاه
- 27واحذر ولا تندب لحاجتك الشرود◆تزهق وتكره مارجيته من وراه
- 28ياذا العنا ماذا العنا الى رقود◆في ليلة فيها بواريد الرماه
- 29ترمي كهطل المرجفات ام الرعود◆فيها القوادح برق مايطفي سناه
- 30اني وان دارت رحاها لا اعود◆الا ولي فيها وسومٌ بالجباه
- 31اما كذا ولا عسى درب العدود◆يبرم بتيه ابلى عناوين الطغاه
- 32مانام بي جفنٍ شكا طول السهود◆لا ما سمعت الصوت يومنه شكاه
- 33واعدتها عيني على شوف السعود◆والله يحقق كل ماعبده رجاه
- 34
hيقن بصوت للفنا تسمع صداه