عديت لك سبعين بارق وشديت
سلطان الجالي26 verses
- 1عديت لك سبعين بارق وشديت◆شديد من ضاقت عليه الرحابه
- 2يامزنة الغيث المسمى لك ابديت◆مافي خفوقي يشتكي من صوابه
- 3البارحه ياقرة العين ناديت◆طيفك دعيته عقب طول غيابه
- 4قلتي وش الي تطلبه يوم ناديت◆قلت امطريني بالوفا ياسحابه
- 5قلتي هواي يسوقني عنك واقفيت◆يوم اختلف ضني وضنك تشابه
- 6قلت اختلافك منك ماوالله اخطيت◆ماهو أنا الي يقفل الهجر بابه
- 7يامزنة القطر المدي عينك ابكيت◆لو تحملين الود للي شقابه
- 8اعرف حدودي وادري اني تعديت◆بعض الحصون الي زهتها المهابه
- 9ساقتني الذكرى وانا مالها اسقيت◆نبضي عطاها من حروفي جوابه
- 10اشتاقها لوكنت عن شوقي اغضيت◆حال النصيب ولابقى لي طلابه
- 11يافقدها ياطول مافيك غنيت◆هذا الذي ماكنت حاسب حسابه
- 12الحب مثل النبض يحيا به الميت◆لو ليلي الموحش سريته نهابه
- 13يافرقدين الجدي فيك استدليت◆لا ادمس ضلام الليل واخفى هضابه
- 14ادل مع طول النظر فيك ماخفيت◆ينثر هجوسي مع نجومك زهابه
- 15طال السفر ياغربة الروح وازريت◆والصبح عيا ينكشف من حجابه
- 16اساير انجوم الظلام المواقيت◆الي عليها فالمواسم رقابه
- 17الجون يانجم السها و التوابيت◆والقايد الي دعوته مستجابه
- 18تهديك يم الجدي من غير تشتيت◆واتلى النعش للقطب كم يقتدا به
- 19انسان انا ياعاذلي يوم حبيت◆اعشق هواجيس الشعر والكتابه
- 20بنت الفكر عندي لها منزل وصيت◆لاغابت احساسي تجيه الكابه
- 21تقبل ليا حنت عليه وحنيت◆مثل السحاب الي ترازم ربابه
- 22واحيان تقفي مثل مايقفي الميت◆فيها الرجا مقطوع عني جوابه
- 23واحيان احايلها وانا ماتواسيت◆تفزع لمطلوبي وتهدي جوابه
- 24اقضي هموم الوقت معها تسليت◆في ليلي الموحش مع الي سرابه
- 25تمثلت لي شفتها يوم لديت◆انثى توقد بالملامح شبابه
- 26لين يتنفس طاهر الصبح سجيت◆مع مزنتي عن موحشات الذيابه