طال السهر
سلطان الجالي28 verses
- 1طال السهر والهم يارحلتي طـال◆واركاب فكري واردات ومصاديـر
- 2اليوم اهوجس وانزل بكل منـزال◆واشوف ربحي واحتسب للمخاسي
- 3واسحب على بحر الطواريق موال◆واجر صوتي بالحروف المصاخير
- 4الله صخرها لجل تشرح لي البـال◆لاضاق بدروب السهر والمشاوير
- 5فضل الكريم الي مواهيبه اجـزال◆مدات جوده بالفـرج والتباشيـر
- 6الحمد له والشكر كله والأفضـال◆والمن له وحده حكيـم المقاديـر
- 7اليوم انا ياواجد الخيـر بالفـال◆افتح لك اضلوعي محبه وتقديـر
- 8ماضاق صدر الي حمل كبر الأمال◆حين الوغى لو المنايـا طوابيـر
- 9ياكم نقول اعراض الأمال واطوال◆ولاكل مطلب تطلبه نفسك يصيـر
- 10صدق الضما لو يصدع الكبد قتال◆مثل الوهم مايجلب لصاحبه خيـر
- 11قد لي ثمان اسنين بهموم واشغال◆انشد مع اعسوس الخلا والمداوير
- 12اشغلني الحض الشقاوي مع اجوال◆بالهاجره كم هاجـرت والدياجيـر
- 13اسرابهـا ماتابعـت كـل مقيـال◆واحرارهـا ماتختلـط بالزرازيـر
- 14يدفع بعضها بعض ببحور واجبال◆ترقا السحاب وتندفـع بالمعابيـر
- 15طارت بأحاسيسي ولي صار منوال◆بين الفصول الأربعـه والتقاريـر
- 16فصل الشتا غربال والفقد غربـال◆لابرد يلطف به ولا بـه مساييـر
- 17حتى الربيع الي مثل حلم الاطفـال◆ذبلة وروده وادمعت لـه مقاهيـر
- 18مر الخريف يجرجر بفصله اذيـال◆حسره نكدها بالغصون المخاضير
- 19والصيف ياخذمابغى وسط منخـال◆ويشعل بعدها بالبواقـي دوافيـر
- 20وابقا وحيد اطلب مفاتيح الأغـلال◆واسمع نشيد الحايره بالعصافيـر
- 21لاكن عسى الي بالحيا واديه سال◆قبل السنين المعجفات المجازيـر
- 22يلقا سمان آمانهن ينفـي اهـزال◆باالي ثمان اسنين مجذب ولا زير
- 23مافادني كثرة وقوفـي بالأطـلال◆وأرمس زماني وأعتذر بألف تبرير
- 24والمستعير الي على البرد يحتـال◆بثياب غيـره يحتمـل للمعاذيـر
- 25والمغتني يعرف قدر كل تفصـال◆والي نسيجه مايجـي بالدنانيـر
- 26حاكه خبير وزامن الجال والجـال◆غيره يشيح بنظرتـه للطباشيـر
- 27مرتاح مايسأل عن القيل والقـال◆وحريص مايدخل على نافخ الكير
- 28فرق الثياب الي تغيـر بالأحـوال◆لو كلها شالت على الصدر أزارير