ضحايا العيد
سلطان الجالي21 verses
- 1لك اشكي ياالله الضعف الشديد وكثرة التهديد◆تدافعنا الفتن ماعاد اندري عن مصادرها
- 2اشوف بدنيتي وحشه وغربة كل يوم تزيد◆وحبال الكيد يمكرها لنا بالناس ماكرها
- 3اشوف اخواني تعاني لضى خوف ووجع تشريد◆وانا مكتوف الايدي ما معي حيله وابادرها
- 4انا يا كم صدع كبدي لهيب الغبن والتنكيد◆نشف ريقي سبايب قلة الحيله وثابرها
- 5وكم يلعب بي الهاجوس عيا يدفعه تنهيد◆يشب ضلوعي بروعي يهشمها يكسرها
- 6إلى مني نظرت وقلت شر ويا عساه بعيد◆اشوف كسور بعظامي ولا غير انت جابرها
- 7تفرقنا وفرقنا العدو الماكر الرعديد◆خبيث يدور الفرصه ويكمن في معابرها
- 8تجبر ثم تكبر ثم جعل لعهودنا تبديد◆منع للخير متعدي ونار الاثم ساعرها
- 9علينا يا كثر ما تفتل حبال الفتن وتكيد◆سكاكين العدا بجنوبنا كثرت مجازرها
- 10اشوف قرومنا صارو ضحايا في نهار العيد◆ولا يا مكثر اعياد العدو ماني ابحصرها
- 11يا ربي تنتقم من كل كفارٍ وحيله بيد◆وجحافلة الضلال اطلبك تهلكها عن اخرها
- 12يا رب انك تذوقهم عذاب الهون والتشديد◆ولا تجعل لهم قوة بعد تفني مصادرها
- 13ولا تبقي لهم ضرع ولا زرعٍ ولا تجسيد◆ولا تجعل لهم بالجو طياره تطيرها
- 14وتجعلنا جسد واحد ولا به عضو عنه يحيد◆ولا تتفارق اطرافه لو ان السيف باترها
- 15وحزب ابليس لايظهر ولا يصبح علينا سيد◆وبطشك هازم الأحزاب خاذلها وقاهرها
- 16تلاحمنا تحت راية نبي الله على التوحيد◆جنود السنه الي ينصر الله من يناصرها
- 17تدك جيوشنا وانت الله الجبار فوق البيد◆وروس الكفر والطغيان راغمة ٍ مناخرها
- 18يارب اقبل دعاي وطالبك لسهامي التسديد◆طلبتك واستر اذنوبي برحمه منك واغفرها
- 19انا يالله طلبتك وانت تفعل ما تشاء وتريد◆بيدك الامر كله بآول الدنيا وبآخرها
- 20طلبتك يالله ان تجعل لي ختامي على التوحيد◆وتجعلني على سنة نبيك ما اغادرها
- 21وتجعل دايم لساني بذكرك دايم الترديد◆وتجعل نعمتك دايم وانا ذاكر وشاكرها