ساقه الله فوق ساقه والقدم
سلطان الجالي18 verses
- 1ساقه الله فوق ساقه والقدم◆في طريقي يوم غادرت البلد
- 2يومه اشر قلت طرقي لي زهم◆والمسافات البعيده لي نكد
- 3والحمل لامن على اثنين انقسم◆هان ثقله ماكبر فيه الجهد
- 4قال منهو شد عزمه واحتزم◆حين حله وارتحاله باالجسد
- 5يوم سلم قال انا كلي ندم◆قبل احوش الذنب ياوجه السعد
- 6قلت صدرك لايضيق ابه النسم◆كان مالك مع مغباته وعد
- 7لاانت خصم ولاخصيم ولاحكم◆وانت عابر في سبيلك ياولد
- 8ليش همك في ملامحك ارتسم◆مايذل الي على الطيب وفد
- 9جيت اطيب خاطر الي مافهم◆هرجتي حين التساؤل له ورد
- 10قلت انا بين الخلايق والأمم◆اعتبرني مثل اخوك ولك مدد
- 11اخرج الي في حناياك ارتدم◆وش تعاني وش نزل بك وش صعد
- 12قال اراني دايم اني متهم◆مع كلامي ماعرفت الي قصد
- 13دوم ضايع في عواقيب الوهم◆والوساوس دونها مالي سند
- 14لين اذاني صابها مثل الصمم◆لادعاني باالنصيحه من نشد
- 15جيت اجاوب منهو لسانه لجم◆مير قفى عن مكاني وابتعد
- 16وشفت علمي مالقاله من لزم◆ومايبي لجراحه اعلاج وضمد
- 17قلت يامن في حباله نعتصم◆يالعزيز الواحد الفرد الصمد
- 18طالبك ياذا الوهايب والكرم◆تهدي الي ماله ابغيرك رشد