خاتم ذهب
سلطان الجالي31 verses
- 1بسم الكريم ابتدي موفي لك اوعودي◆وخاتم جنيه الذهب ختمي لنقادي
- 2يكفيك يا قايل القيفان لانودي◆مايتلف العجز من له حق وينادي
- 3لقيت مفتاح صندوقي مع اجدودي◆وابقيت ميراث كنزي ورث لاحفادي
- 4وتشهد لي افحول تحصي عدة انقودي◆لاجاك منهو بنظم الشعر نشادي
- 5عندي من الناس يوم اشهرته اشهودي◆يوفون لوماكلو من ملحي وزادي
- 6حيث اني احفض عهودي واحفض اسدودي◆مايوم سفهت بالياقوت ميعادي
- 7وتنازل العد يشبه ذروة اصعودي◆ويعكس رقيي تفاوت منزل اعدادي
- 8يوم ابحر بغبة الامواج واعودي◆عزاي لين يتحقق جملة امرادي
- 9ابحرت ياهاجسي متعلق بعودي◆ساهر معك يوم ماعاينت مرقادي
- 10علقتك الروح كافح دونها ذودي◆لوك على شانها تبحر مع الهادي
- 11وآسابح الموج كافح لينك اتعود◆لونالك الكود واقبل قول له عادي
- 12وفضلك بالاصدار مالك فضل بورودي◆يفرق بالاصدار منهو كان ورادي
- 13وش عاد لو ماتذوق اعيوني ارقودي◆مادمت اسامرك نالت عندك اسعادي
- 14تنبذ صدودك واناانبذ مثلك اصدودي◆ويفوح بحضورك الريحان والكادي
- 15إجت ابمهب الهبايب تدرك اصمودي◆ولاتحتمي في مصالح حالة ارصادي
- 16يوم استوى هاجس احساسي على حدودي◆حان اللذي كان بالطاروق ميعادي
- 17طبخت لك قلب واهديكيه من جودي◆في نار هاجوسي اللي معسر اضمادي
- 18تعتاش لو ماشبعت وتنقض اقيودي◆صدرت من غرفتك بادي روى بادي
- 19ترقا ليامن رقيت بقمة اسنودي◆ما اتابع اللي نزل في قاعة الوادي
- 20ادري واميز مكاني واعرف احدودي◆ماني مدرعم على مجهولي وغادي
- 21اخذت راية جيوش الهم بجنودي◆هاجوس صدري تغنا طيره الشادي
- 22لي ياخوي قلب ماسكنته احقودي◆لو الهجر والجفا طول به احدادي
- 23واقف على كثر ماعاني من اشرودي◆شفني على باب حيره تشلع ارقادي
- 24صابر على اللي سكب في كبدي اوقودي◆مامل ياخوك لي صبري ولا اجهادي
- 25فالوقت ميزت وينه نقصي وزودي◆وابصرت وين اللذي يكرم لي وفادي
- 26يانور وهاج مايطفي ولو عودي◆اهديت حزة ضهورك حيره الغادي
- 27منك التناشيد واخذ اليوم مردودي◆صبيت سبكي ذهب من حبكة اعنادي
- 28لك الضيا لا مشيت وجنب السودي◆وقل للبدر شوف عين الشمس وقادي
- 29عزيز ناصيك ومعاديك مطرودي◆منصور رغم انف منهو جالك معادي
- 30للهاجس اشعل فتيلي واقدح ازنودي◆والحر مايدمي الا صيدة مرادي
- 31لوكان شعري عجز لايبلغ احدودي◆يطول لا جيت ابشرح غاية امرادي