أنشودة التنهيد
زايد الرويس12 verses
- 1لو رمشك النعسان ياخذني عـن عيـون الليالـي◆ما جيتك (اتمرجح )على ياسٍ تحدانـي لهيبـه !
- 2يا المترف اللي من ترفك : المُر مهما مر حالـي◆سافر بك الليل وسألت : الليل من يقدر يجيبه ؟!!
- 3انا ( الضحيّه ) للسهر لا اقبل يغني ( من خلالي )◆أنشودة التنهيد ) وانـت بعيـد والسكـه قريبـه
- 4قم صبّ لي من صوتك ( التحنان ) ما يكفي لبالي◆عن لحظتين من ( القلق ) والشوق والدمع وصبيبه
- 5لو يرجع ( التاريخ ) بالتاريخ ما جيتـك لحالـي◆واقفيت عن دربـك بـلاي بخطوتيـنٍ مستريبـه
- 6ماهوب انا لا والله الا كـل غالـي حـب غالـي◆مابه حبيـب الا وهـو يرتـاح لمعانـق حبيبـه
- 7شفني وانا امشي في طريقي ما قدرت اسبق ظلالي◆متعثـرٍ فـي دربـي المظلـم ولحظاتـي كئيبـه
- 8قدّ الحزن آخر قميص للفـرح واوشـك سؤالـي◆ينهار بي وادفع على صبري وتسويفـك ضريبـه
- 9والبارحه جيـت ارسـم الدنيـا بتفكيـرٍ مثالـي◆لقيتهـا فوضـى ترتبنـا وكـلٍ لــه نصيـبـه
- 10في وسط مسرحها ضجيج اصوات واموات وتسالي◆وافراح وجـراح ودهاليـز ومساحـاتٍ رحيبـه
- 11وانا اجلس لحالي قريت حكايتي واللـي جرالـي◆وشفتك تسولف لي عن التنهيد والعيد وصويبـه !
- 12كنت اتمنى لو تسافر بـي عـن عيـون الليالـي◆وعيون ناس وياس واحساسـك يطوقنـي لهيبـه