رسالة إلى صدام
خلف بن هذال54 verses
- 1سوولي الكيف و ارهولي من الدلة◆البن الاشقر يداوي الراس فنجاله
- 2كيف (ن) لنا نحرجه بالنار و نذله◆وليا انقطع لو ورى صنعى عنينا له
- 3البارحة الليل ما غمضت به كله◆اراقب الصبح جالس و اتحرى له
- 4ابعث شريط مضى و اطويه و افله◆و اقول من يحفظ التاريخ لأجياله
- 5قل للعراقي يفتش جعبته قله◆يلقى بها شي ما يطرى على باله
- 6الهم و الغم و الطاعون و العلة◆حقه لحاله كفايه حقه لحاله
- 7من صفعة ذاقها بانت به الخلة◆يذكر هزيمة شهر شعبان و هلاله
- 8قام التعل يشتغل و يشاغل الشلة◆عزت و طارق و عد عدي و امثاله
- 9يذبح و يصرخ يده حمرا و مبتله◆شي يخلي جبين الحر ينداله
- 10يا ناس.. ياويل من هذا زعيم(ن) له◆الشعب في وضع يوسف له و يرثاله
- 11شعب شرب كره و اكل كره كره له◆يتفل على صورته و يدوس تمثاله
- 12تبت يدا اوبو لهب تبا و تبا له◆و اللي معه بالحطب للقوم حماله
- 13مدمن على طبخة بالحيل تعمل له◆يوخذ بها الثار و الثورة تسوى له
- 14حتى نسيبه ولد خاله تحيل له◆لغم له الهيلوكبتر و انشدوا خاله
- 15الله ما يهمل الظالم و يمهل له◆و ان طال به عمره اخس شوي و اردى له
- 16الحكم منهار و الاحكام منحلة◆ما اخس من حالة فيها ولا حالة
- 17من ردي حظه في اهل بيته يزول له◆صار الشجر قوم بعيونه يورى له
- 18من كثر ما يرتميه يخاف من ظله◆و من يعلم الغيب لو عدي قتاله
- 19صدام انا بنشدك وش انت حي(ن) له◆مثلك بغبنه يموت و موته اشواى له
- 20ما عاد تملك من السلطه خبر لــــله◆خارج عن السيطره دولتك منثاله
- 21جمع عظامك سوات مجمع الجله◆و احرق بها ما درى بغداد برجاله
- 22الجيش يرزح تحت ذل من الذله◆و الشعب مسكين تضحك له و تغتاله
- 23و اذاعتك يا سويد الوجه منشلة◆ما عندك الا يا لاله يا لا لا له
- 24اي بالله اسمعك زين اي بالله اي بالله◆و اذا تبين عدو بنا و حنا له
- 25ما تدري انا نعقد الحبل و نحله◆بالعسر و اليسر حلاله و فتاله
- 26نعسف الصعب ثم يجيك مزين دله◆اديب ما يشتكي عرقوب جماله
- 27ما نقتنع بالهجاد نصبح الحله◆مع الغطاليس رجليه و خياله
- 28و الدار ماهي(ب) يا صدام محتلة◆ما استعمرت قبل حكم العود و اعياله
- 29و اليوم عنها نسن السيف و نسله◆من شط وخذ الطريق نصلح احواله
- 30و الفهد تخسى عنه ما انت بقبيل(ن) له◆و طى برجله على غاربك بنعاله
- 31ما انته بكفوه و لا شرواك كفو(ن) له◆الفهد يكرم عن المشبوه و امثاله
- 32الفهد عز العرب و العرب عز(ن) له◆و كم دولة تستغيث المال من ماله
- 33العادل العدل و الاسلام شرع (ن) له◆و لبيعة المسلمين البيعه اولى له
- 34ولا انت مهزوم لا مذهب ولا مله◆امقطع اربع تطيح بكل محباله
- 35مما مظلك تخدع الشعب و تظله◆مفسد و يدعى عليك و فهد يدعى له
- 36و ين انت ياللي له العذرى تكحل له◆يقوم لعيونها و تشوم لافعاله
- 37من طيب ابوها تبي وصفه عن اليله◆يقلط على شوبة البارود و اظلاله
- 38ابيك في لازم (ن) قدك و قد(ن) له◆قمر عرب سات يبرا لك و تبرا له
- 39امر ضروري و خلك مستعد(ن) له◆ما انته مراسل تجي و تروح برساله
- 40عندك مهمه و قلبك ما برد غله◆جدول مسيرك تعرف العام مدهاله
- 41اركب على اللي قنابلها من السلة◆بمكبرات الصور في الجو جواله
- 42اخلي المدرج و تل بريكها تله◆و اخفق بها خفقة الكدري لمقياله
- 43انحر بها خاين النهرين و افطن له◆لا ذكر بالخير في حله و ترحاله
- 44حدد مكانه بتلسكوب و انزل له◆انزل رويدا رويدا و اكبس الاله
- 45حربية عاد يالسودى تسلل له◆تسللت من جهة عمان و اجباله
- 46جاته من الغرب عبر اجواء صديق (ن) له◆تحمل على متنها حزنه و سلاله
- 47ترسم هدفها على الليزر و ترسل له◆اشارة الضبط و المضرب تهيا له
- 48ما تحمله ترفعه مترين و تهله◆مع ذرة الشمس في قصره اتحمى له
- 49تعطيه ضربه تدك القبو بالفلة◆و الشر فاله و فال الله و لا فاله
- 50من شدة الانفجار اقول باسم الله◆تهتز الاهواز و البصره بزلزاله
- 51في سبع الارض تحفر له و تدفن له◆من تحت الانقاض و الانقاذ ما شله
- 52ياخذ سنه يلتهب قبوه كما الملة◆يذوب صنقل الساعه و سلساله
- 53ثم خل غيره يشوف و يعتبر خله◆و اللي يبي مثلها بالحال تثنى له
- 54الضعف ما حطه الطيب سبيل(ن) له◆ثم قيل من لا يعيل تجيه عياله