كلٍ يعوّد لاصل جدّه ومرباه
خالد الفيصل12 verses
- 1كلٍ يعوّد لاصل جدّه ومرباه◆راعي الشرف يشرف والانذال يهبون
- 2الفْرع من عوده شرابه ومسقاه◆والحنظلة مرّه ولو تشرب مزون
- 3الطّيب كايد والمناعير تقواه◆والهون هيّن تدنع النفس وتهون
- 4ناسٍ على كسب المراجل مضرّاه◆وناسٍ على كسب الفشيلة يضرّون
- 5هذا على وضح النقا كل ممشاه◆وهذا الى شافوه ربعه يصدون
- 6لا تامن الخوّان لو زخرف حكاه◆من خان بك مرّه يبي باكر يخون
- 7وافطن ترى زول الرّجاجيل توّاه◆كم واحدٍ يعجبك زوله وهو دون
- 8يا طيّب الشارات من يوم منشاه◆احذر عدوّك لايغدرك على هون
- 9ترى عدوك غايته فيك ومناه◆يزرع بصدرك من قنا رمحه طعون
- 10والّلي رضع لبوة عدوّك توقّاه◆الجرو ولد اللبوة الّلي تعرفون
- 11للطّير يالصقّار بالرّيش مغواه◆الجاهل الّلي باكثر الريش مفتون
- 12للحُر والشبوط ماكر ومجناه◆والفرق بالافعال لو هُم يطيرون