يادنيا_حزنك_جبال
حسني عبدالله جاد27 verses
- 1يادنيا حزنك جبال◆فوق الصدور حطت
- 2قتلت بذور الأمل◆من قبل ماتنبت
- 3وكل مادا ومادا◆الحزن في قلوبنا
- 4عمال بيكبر لحد◆فروعه ماتمدت
- 5ماتقوللي فين الأمل◆وسط البطالة ياعم
- 6وناس بتسرق وتنهب◆وناس حياتهم هم
- 7وناس تدوس الغلابه◆من غير خشى ولادم
- 8وناس خلاص افتروا◆وماتت ضمايرهم
- 9واما الضمير ينتهي◆مات الأمل م الغم
- 10ياعم وفر كلمتك◆واكتمها للأيام
- 11وشوف مكان يسترك◆وادارى لجل تنام
- 12دي الدنيا مش دنيتك◆ماتعيشي في الأوهام
- 13وان كنت فاكر◆هاترجع زي ماكانت
- 14كفايه صحصح بقى◆واصحى من الأحلام
- 15الخوف معشش وفارد◆ضله ف ضلوعنا
- 16خايفين على نفسنا◆ونخاف على زروعنا
- 17اللقمة مرة بناكلها◆تحلالنا من جوعنا
- 18وندوس آهات الألم◆ونداوي ف اوجاعنا
- 19وعيوننا لو رغرغت◆نقفل مدامعنا
- 20ولو رنين الأمل◆زغزغ مسامعنا
- 21وقلنا ضحكت خلاص◆الدنيا من تاني
- 22نلقى شيطان الخوف◆صحى مواجعنا
- 23ممكن نشوف الأمل◆بس ف زمن تاني
- 24زمن نشوف الناس◆بتحاسب الجاني
- 25زمن نشوف الديابه◆ويا الغنم ترعى
- 26ونشوف جميع البشر◆لاتخاف ولاتعاني
- 27
حسني عبدالله