أعشقك !!! وبأي حق
حسني عبدالله جاد89 verses
- 1ماتقولي ليا بأي حق◆أرجع أحبك وأعشقك
- 2وأقبلك !!!◆ماتقولي ليا بأي قلب
- 3أقدر أحسك وأقبلك◆إني ف طريقي اللي بديته
- 4إن لاقيتك هامنعك◆وابعد خيالي عن خيالك
- 5وان فضلتي هاخدعك◆وماتحلميش تلاقيني يوم
- 6راجع أقولك واندهك◆أنا قلبي سامحك رغم جرحه
- 7وبرغم جرحه هايعشقك◆لا لا لا أنا باكرهك
- 8كنت زي الطفل لما احتاجتلك◆ومشيت معاكي في بداية سكتي
- 9مانكرش إني الف مره ارتاحتلك◆واشتاق اليكي لو بعدت بخطوتي
- 10وان شاورتي بابقى رهن مشاورتك◆والقلب يفرح إن عملتي بفكرتي
- 11وإن عطفتي ده بعض من حنيتك◆وان ضحكتي ده حسن حظي وقسمتي
- 12وان حضرتي بالقى روحي ف حضرتك◆وان جافيتي بتاخدي روحي بدمعتي
- 13واتاري إني باعيش واموت ف محبتك◆وحلمت إنك كنتي واخده محبتي
- 14وشغلت قلبك باللي دايما يفرحك◆وزرعت فيكي ابتسامتي وضحكتي
- 15وبدأت أرسم في خيالي جنتك◆مالحقت اكمل أو أخلص رسمتي
- 16الا ومال بيا الزمان◆غيرتي ناحية خطوتك
- 17حسيت بخوف بعد الأمان◆وانا في حيرتي ودهشتي
- 18وسألت نفسي أسئلة◆وقولت لازم أسألك
- 19لفيت في كل الأمكنة◆أشكي وأبكي محنتي
- 20وجيت لحدك باسألك◆ايه اللي غيَّر وجهتك
- 21ايه اللي كان مني حصل◆واللي جنيته يادنيتي
- 22رديتي زمنك انتهى◆وكسرتي قلبي بقسوتك
- 23ورجعت مكسور الجناح◆منك وشايل بلوتي
- 24لا أنا قادر أنسى اللي كان◆أو أنسى قسوة فعلتك
- 25ولا قادر انسى انك خلاص مايهمكيش نفسيتي◆كان عندي إني مشوفتكيش
- 26ولا إني اسمع كلمتك◆لكن عرفت انك مافيش
- 27وانك قتلتي فرحتي◆واما اتعدل بيا الزمان
- 28فجأه وف نفس المكان◆الاقيكي جايه تطأطأي
- 29وتداري عني كسفتك◆وبكل جرأة بتطلبي
- 30إني أسامحك واعشقك◆دلوقتي عايز أسألك
- 31وياريت تجاوبي وأسمعك◆ماتقولي ليا بأي حق
- 32أرجع لحبك وأعشقك◆وأنا باكرهك
- 33واكره حياتي لو أطاوعك◆أو أسامحك وارحمك
- 34عمري ماكنت اتصور إني◆ح ابقى لوحدي ومن غير حد
- 35وانك إنتي اللي ماليش غيرك◆أول واحدة تخون العهد
- 36كنت اتمنى إني أشوفك◆واقفة بجنبي وماده لي يد
- 37دا اللي مابينا حاجه كبيرة◆كنت صاينها وصاين الود
- 38لكن إنتي ف أول خطوة◆بعتي دا كله نسيتي الوعد
- 39ليه بعتيني لما قابلتك◆ليه مالقيتشي غير الصد
- 40دانتي ف هجرك كنتي شديدة◆وانتي ف جرحك كنتي أشد
- 41شوفي إزاي انتي قتلتيني◆ودفنتيني ف أضيق لحد
- 42مين ينصفني إذا كنت لوحدي◆مين يساعدني يقيم الحد
- 43انا دلوقتي برئ من حبك◆واللي مابينا أكبر سد
- 44والوقتي عايز أسألك◆وياريت تجاوبي وأسمعك
- 45ماتقولي ليا بأي حق◆أرجع لحبك وأعشقك
- 46واكره حياتي لو أطاوعك◆أو أسامحك وارحمك
- 47وماتحلميش تلاقيني يوم◆راجع أقولك واندهك
- 48كنت معاكي مصدق إني◆أول حب وآخر حب
- 49كنت باشوفك فرحة عمري◆وانك مالكه وساكنه القلب
- 50بس خساره الف خسارة◆لما عرفت بكل مرارة
- 51إنك وهم وحيرة وذنب◆وانك كلمة ف قصة انكتبت
- 52كل حروفها كدب ف كدب◆وانتي خسرتي لما راهنتي
- 53إني هاكون لك مهما عملتي◆وانتي عملتي فوق ماتصور
- 54فيه ايه تاني بعد ماخنتي◆بعد دا كله باقي كلام
- 55مين يسمعلك لو قولتيه◆وان قولتيه أو حتى سكتي
- 56لتنين واحد يالا قوليه◆حتى ان قولتي هاموت من بعدك
- 57عمري مافكر يوم ارجع لك◆مش هاشتاقلك ولا هاحتاج لك
- 58واللي أنا فيه خلاني زهدتك◆باهرب وابعد لما باقابلك
- 59وانسى الفرحة ان مرة صادفتك◆د انا باتمنى تعيشي لوحدك
- 60أصل الغدر حقيقي ف طبعك◆أرجع لحبك وأعشقك
- 61الأماني جمعتها ودفنتها◆لما عرفت ان حياتك
- 62كلها كدب وخداع◆والأغاني كرهتها ومسحتها
- 63وندمت إني فيكي إنتي كتبتها◆بعمري اللي ضاع
- 64مش كفايه إني ضحيت بالأماني◆والأماني نبض قلبي
- 65اللي مابيعرف يخون◆مش كفاية إني ضيعت الأغاني
- 66والأغاني دي مشاعري◆والمشاعر ليه تهون
- 67دا اللي خانني واللي خان كل الأماني هوه إنتي◆واللي باعني واللي باع كل الأغاني برضو انتي
- 68والعذاب اللي ف حياتي كله منك◆والجراح اللي في قلبي منك انتي
- 69إيه ؟ ماعرفش إنتي بتلعبي بعواطفي ليه◆إيه ؟ ماتروحي عني وابعدي عايزاني ليه
- 70كنت ناسي عذابي وانتي◆جايه ليه بتعذبيني
- 71كنت ناسي جرح عمري◆جايه ليه بتفكريني
- 72بعد إيه جياني تبكي◆إنتي فاكره هاتخدعيني
- 73صارحيني يالا بكدبتك◆قولي الحقيقة اتكلمي
- 74ماقدرش أصدق دمعتك◆وانك حقيقي بتندمي
- 75هوه انتي ناسيه قصتك◆والا انتي عايشه بتحلمي
- 76من بعد ماقدرت ابتعد ونسيت مكانك◆القاكي جايه بتطلبي أرجع عشانك
- 77هوه انتي صنتي الحب حتى أصدقك◆والا انتي صنتي القلب حتى اسمع كلامك
- 78من بعد ماعرفت الفرح وقدرت أغني◆القاكي جايه ترجعي دموعي اللي غابت
- 79هوه انتي فاكره انك طلبتي الحب مني◆لأ إنتي جايه تفتحي جراحي اللي طابت
- 80ياللي عديتي الأصول◆ياللي توهتي العقول
- 81ياللي صحيتي المواجع◆انتهت عندي الحلول
- 82بعد ماشوفت خلاصي في بعدك◆ولقيت قلبي اتحرر منك
- 83بعد دا كله لاقيتك جايه◆بتصحيلي جراحي بعندك
- 84واما انا قولت خلاص ارتاحت◆ولقيت نفسي خلاص وفرحت
- 85جيتي كأنك ذنب لازمني◆وأنا من بعد ماسيبتك توبت
- 86توبت أصدق تاني وعودك◆وانتي الخاينه لكل عهودك
- 87حتى القلب الطيب فاتك◆رافض أي مكان في وجودك
- 88واما اختارت لنفسي طريق◆بعد ماإنتي اختارتي طريق
- 89كل مابينا صبح مسافات◆كل طريق كان عكس طريق