نصايح عشر
حسن عامر آل عيسى27 verses
- 1لاوله بسم الله الرحمن◆الخالق الرازق عظيم الشان
- 2له الثناء والحمدله والمنّه◆جل العظيم مكون الأكوان
- 3والثانية صلاة ربي تغشى◆محمد الهادي النبي العدنان
- 4اللى بعثه الله وبلغ شرعه◆تبارك الله منزل الفرقان
- 5والثالثه يامن سمع من نظمي◆عندي نصايح تهدي الحيران
- 6اركان الاسلام بصوابع كفك◆خمسة ادلتها من القرآن
- 7وحّد اله الكون جل جلاله◆وابعد عن اهل الشرك والعصيان
- 8وخمس الفروض اللى فرضها الباري◆حافظ عليها وادها باحسان
- 9وزكاة مالك والصيام وحجك◆حتى تكمّل خمسة الأركان
- 10ولرابعه برك لابوك وأمك◆مقرونة بعبادة الديان
- 11اخفض لهم صوتك وقل ياربي◆اسألك تعتقهم من النيران
- 12والخامسه حق القرايب واجب◆والضيف والاصحاب والجيران
- 13واصل قريبك لو يكون مقاطع◆وللجار حق بجملة الأديان
- 14والضيف ليمن جاك فشرح صدرك◆وشرح الصدور اكرام للضيفان
- 15واعطه من الميسور كب الكلفه◆واكرم جنابه والكريم معان
- 16والسادسه أحفظ عليك لسانك◆كم واحد من زلته ندمان
- 17حصائده توصل لبوب جهنم◆وتوردك موارد الخسران
- 18والسابعه عند البلى اصبر واشكر◆واحذر تسخّط تفرح الشيطان
- 19ماقدّر الله في الكتاب يصيبك◆ماتنفع الحيطه ولا السلطان
- 20والثامنه اصدق و حب الصادق◆واحذر من اهل الزور والبهتان
- 21الكذب لو مشاك هو والحيلة◆لابد يظهر ماخفي ويبان
- 22والتاسعه عند القضا لاتفجر◆أوف العهود احذر تكن خواّن
- 23كم واحدٍ عند الخصومه يفجر◆وظلمه على الأقران والأخوان
- 24والظلم من يمشي طريقه يندم◆ولافيه ظالم يعتبر ربحان
- 25والعاشره لاتستمع للواشي◆لاجاك يسعى لك بقول فلان
- 26من جاب لك هرجه نقل من عندك◆وزوّد عليها من الحمول اطنان
- 27هذي عشر والنصح بابه واسع◆ونشد سديد الرأي والفهمان