ماعاد اجامل ولا حسب رضى الناس
حسن عامر آل عيسى11 verses
- 1ماعاد اجامل ولا حسب رضى الناس◆من كثر ماشفت بالعالم سماجه
- 2في منهج الزور ماشي على ساس◆ذا يمدح الصقر ويذم الدجاجه
- 3والصقر واش مكسب اهله غير الافلاس◆يتعب مربيه من كثر احتياجه
- 4غالي وحتى لباسه قيس قياس◆ونافخ وفوق السماء يرفع حجاجه
- 5واكبر مثل طير بن برمان قرناس◆اللى تربى على دروب العواجه
- 6يجيب حيّه ويلقيها على الراس◆لابارك الله بسعيه والدواجه
- 7والا الدجاجه مليئه طيب واحساس◆تشبعك بالبيض وتزيد اللجاجه
- 8والديك له صوت زين وقوه وباس◆ويناقر الخصم ويثوّر عجاجه
- 9صراحه اني غديت الفكر محتاس◆وافكر احيان تفكير الخواجه
- 10الكلمه اللى تضع مابين الاقواس◆تشغل الفكر وتزيد اختلاجه
- 11واللى يفكر بعقل يجيه وسواس◆ومن يتبع الصدق مايلقى خراجه