على شأن مايشره عليه خيار الناس
حسن عامر آل عيسى22 verses
- 1على شان مايشره عليه خيارالناّس◆اغمض عيوني والسواليف امررها
- 2وليمن بنيت احكم جدار البنا والساس◆وعمّر بيوتٍ نادر اللى يعمرها
- 3ونظم بيوت كنها البن فالمحماس◆اكيّف بها روس النشاما واقدرها
- 4عرفت أن كثر الثرثره مصدر الافلاس◆وبعض الاوادم قوّها في حناجرها
- 5تزابد وتهدر صوتها يشبه الاجراس◆طبيعه ودائم تحتري من يناقرها
- 6ومن يكثر الهدره يسمونه الهلاّس◆يغث المجالس والسوالف يكررها
- 7اذا لقي له براد شاهي وعبّا الكاس◆يعمّر يدمرّ والرواسي ينثرها
- 8تقول خاض حربٍ مثل دهام ابن دواس◆وياكم جيوشٍ بتّ سيفه عساكرها
- 9وبعض الحكاوي طبّها بالقدم تنداس◆ويكفيك عن بعض الروايا مصادرها
- 10ومن عادتي ماواطن الشلّه الانجاس◆وقبلما اتوطأ القوم احذر وأنذرها
- 11تبين الفعول اذا أعتلى بالسماء القرناس◆وسود الافاعي تنجحر في خبايرها
- 12ولا كل شي اصفر ذهب به ذهب ونحاس◆ولوّ المصانع كل سلعه تطورها
- 13تبين المعادن بالحما والحما حساس◆اذا عرضت للنار بانت مخابرها
- 14فلا تنخدع في بدي يبرق كما الألماس◆ترا معظم الاشياء يغرك مناظرها
- 15ياكمن هذورٍ تحسب أنه قوي الباس◆ويجحد مواقيف النشاما وينكرها
- 16يعاند وينكر فضل (غيره) وطي الراس◆وهو مايساوي فردةٍ من كنادرها
- 17معه بندقٍ يرمي بها مالها متراس◆على كل وجهه بالذخاير يثورها
- 18ولا ياخسارة بندقٍ مالها مقياس◆تشرّك كثير ولا تصوب معابرها
- 19واباقول كلمه واضحه ما عليها اقواس◆ترى الصدق عمله ماخسر من يدورها
- 20تعلم وجرّب واضرب اخماسها واسداس◆ومد القدم طوّل خطاها وقصرها
- 21لو الخوف يسكن قلب عباس بن فرناس◆ماكان ارتقى فوق الشواهق وحدرها
- 22تعيش الاسود بعزّ ولاّ البساس بساس◆عرفنا البساس وخابرينن عقايرها