عثراتي
تركي آل الشيخ11 verses
- 1من كثر عثراتي وخيبات العمر◆وغدر الحبيب اللي غدى ماهو حبيب
- 2ماعاد فيني حيل باقي أو صبر◆وحالات حزني فيني تودي وتجيب
- 3تلعب بي الآهات و احساس القهر◆من قسوة الإحباط والحال الصعيب
- 4من قال بالدنيا بشر توفي لبشر!◆واللي تحبه فيه ظنك مايخيب
- 5لا والله إلا الغدر يتلاه الغدر◆والحب كذبه بين شك وبين ريب
- 6واللي تحبه ليش يطعن في الظهر◆ترى أصعب الغدرات لا جت من قريب
- 7صار الوفا نادر وغلطاتي عبر◆والعمر في طوله وفي قصره كئيب
- 8ماعاد افكر في حبيب ولا انتظر◆مثل الغريب اللي مفارق له غريب
- 9والليل هذا لا نجوم ولا قمر◆و اشيائي الحلوه عن عيوني تغيب
- 10لا حولي المينا وأنا وسط البحر◆وفي زحمة الأحزان قلبي مستصيب
- 11عزّاه يا عزّاه يا خيبة عمر◆عزّاه ياقلبٍ غدى ماله حبيب