قالوا جديدك غاب
امجد الدبيسي16 verses
- 1قالوا جديدك غاب وقلت العتب ليه◆اغلب قصيدي راح في ظلمة الليل
- 2مليت انادي من يبيني وانا ابيه◆اقفى يعد خطاه بالحط والشيل
- 3لاواصلٍ صوتي ولا احدٍ مناديه◆والفارس إليا طاح ماعاتب الخيل
- 4احساسي اني بالقصايد ابرثيه◆واخاف لامني كتبت اكتب الميل
- 5لانه من العالم .. ولا احدٍ يثنيه◆ولانه مزاجٍ مارجا نفحة الهيل
- 6مخلوق رايق وانزعاجه يحليه◆وبعيونه العالم سوات المهابيل
- 7مغرور والكبره من ابرز معانيه◆ومْن الدلع إحساسك شوي ويسيل
- 8متناقض وكل التعابير تبغيه◆ياما من اسبابه لفى القال والقيل
- 9وطاغي حلاه ان شافه العود يغويه◆والا الرضيع يطالب امه بتبديل
- 10وشلون من حَبّه وقفى يغنيه◆انا اشهد انه ذاق في دربه الويل
- 11من غرته ألين تاصل مواطيه◆معني الضياع وماتجيب البهاذيل
- 12ان قيل قلبك ويش اخر امانيه؟◆ودي بليله معْه في شاطي النيل
- 13ليله من سنيني تكفي وتنبيه◆عن عاشقٍ من دمعة الخافق يكيل
- 14ويرمي على طول المسافه بلاويه◆واخر علومه .. طاح من عزمه الحيل
- 15يا اللي طلبت الشعر من شاعرٍ فيه◆من جور ليله مايبكي له الجيل
- 16هذا جديدي والشعر له قوافيه◆وانا لي الله وارتكاز المعاميل