غاب اتصاله
امجد الدبيسي15 verses
- 1غاب اتصال اللي خذا القلب وامسيت◆اهوجس بطاريه واقول وش فيه
- 2وش فيه ناسيني انا ويش سويت◆مايدري اني عقبه بحالة التيه
- 3مايدري اني حارقٍ شارع البيت◆رايح وراجع كني شرطي وحاميه
- 4مايدري اني من الغياب استجنيت◆واصبحت اخيله واقفٍ ثم اناجيه
- 5وآشيب عيني ما عرف حي او ميت◆وآشيب عيني من يترجم معانيه
- 6كني شرار وصالي الهم كبريت◆انا احترقت ولكن ابيه وابيه
- 7ابيه يعرف كيف بالصدر كنيت◆لوعة رضيعٍ فاقد امه على ابيه
- 8لايحسب اني من قصيدي تواسيت◆مع كل حرفٍ تدمع عيون مغليه
- 9وصار الحزن معناي لامن تغيت◆ما كنت احسب اني على الغير اشاكيه
- 10هذا الشعر جيته عقب ما ترديت◆اشكي لاوزانه وتبكي قوافيه
- 11واردها في داخلي واكتم البيت◆اخاف مايقوى ويهدم مبانيه
- 12وارجع واخطه واكربه بالعفاريت◆واقول ياغايب .. يرد الصدى ليه
- 13ليه انت ياشاكي بحزنك تماديت◆واقول دعواتك وغيره ابلغيه
- 14ما ابيك تتشرّه لصبري تعديت◆ابيه يرجعلي وقلبي اهنيه
- 15ياليت ما تكفي ولكن ياليت◆ياليت انا ادري صاحبي بس وش فيه