البارحه يوم الخلايق نياما
امجد الدبيسي25 verses
- 1جاني يا ابن عدوان بين الأناما◆شعرٍ على ماداج بالقلب موزون
- 2البارحه يوم الخلايق نياما◆بيّحت من كثر البكا كل مكنون
- 3مثلك بكيت وآنثر الما على ما◆وماعاد به دمعٍ عن الناس مخزون
- 4كان التوجد بعد شهْر الصياما◆على الذي في ثاني العيد مدفون
- 5يكفيك ماعشته معاه بعواما◆اللي على حب ونقا كان تقضون
- 6مير البلآ باللي يهل النداما◆على عشيرٍ بين هالناس مغبون
- 7كنت الغصون وكان طير الحماما◆بس القدر ماجمّع الطير بغصون
- 8ماطاعوا اهله يوم قلت الغراما◆بعد الرضا قاموا علينا يعيون
- 9وزفوه للي مايعرف السلاما◆شايب سلوم الطيب منْه يتبرون
- 10وكل السبايب مالقوا للمحاما◆وروّح ضحيّه بين داين ومديون
- 11يبكي عليّه واسمعه بالمناما◆وابكيه طول الليل والناس يوحون
- 12ماهمني لو عشت بين الظلاما◆وماهمني لو قالوا الخلق مجنون
- 13وفي يوم شفته بين سوق وزحاما◆جاني كلام الضيم من دمعة عيون
- 14وقالت طلبتك شوف لك ايّ لآما◆وإن كانها بالزين تلقالك زيون
- 15قلت الحلآ ماهو بشكل ولثاما◆خلي الذي مدفون بالقلب مدفون
- 16واقفيت كن العمْر لحظة ختاما◆وماعاد اشوف اللي على الدرب يمشون
- 17لي بالصدر ونّه كثيرة لطاما◆احس فيها كنّها شي مطعون
- 18او كنّها طيرٍ جناحه حطاما◆وماهو بشايف غير مخلاب وسنون
- 19الموت علمٍ ضامنه مايلاما◆لكن يبي يعزف قبل موته لحون
- 20مثل الوصيّه للفروخ اليتاما◆وللحين صوته بين الاضلاع مسكون
- 21ماعاد ينفع لو اهل الكلاما◆وكل المشاعر داخل العين يبكون
- 22دربي عليه اليوم اصبح حراما◆وماني من اللي بالحرام يتهنون
- 23يانمر ابن عدوان يا ابن الكراما◆رحلت عن حزنك وعن ضيقة الكون
- 24تركتني مابين رمح وسهاما◆عايش ولكن عيشتي ميت محزون
- 25والبارحه يوم الخلايق نياما◆مْن البكا ماعاد به دمْع مكنون