هل دمعي
احمد الناصر10 verses
- 1هل دمعي على خدي نهار الوداع◆يوم قالوا فمان الله جاني بلاي
- 2التفت والتحضني بالعيون الوساع◆وارسل الدمعه الي زاد منها عناي
- 3خايفً من فراقٍ ماوراه اجتماع◆ياالله اليوم لاتقطع رجاه ورجاي
- 4طاحت اقدام رجلي في محلي ذراع◆مااقدرالمشي قدام ولا ارجع وراي
- 5صرت مثل الغرير الي بسن الرضاع◆اتضيم واصيح صياح من غير راي
- 6جعل من لاع قلبي في فراقه يلاع◆حيث وصله هوى قلبي وغاية مناي
- 7اتصبر ولا ودي يطول النزاع◆واكتم الغيض بااسبابك وهذا جزاي
- 8الهوى له يذل القلب لوهو شجاع◆مثل ماردني ترف القدم عن هواي
- 9خايف السر من بيني وبينه يشاع◆ثم تدري الخلايق عن خفاه وخفاي
- 10المصيبه ان كان الود والعرف ضاع◆ثم زادت شجوني من خلايف خلاي